Türkiyənin hücumu – ABŞ-ın cəzalandırma planı -TƏHLİL - FOTO
Türkiyə Müdafiə Nazirliyinin bildirdiyinə görə, Türkiyənin quru qüvvələri Suriyanın şimalındakı kürd döyüşçülərinə qarşı hücumları intensivləşdirib. Suriyanın sərhəddəki kənd və qəsəbələrinə havadan zərbələr endirilib, artilleriyadan mərmilər yağdırılıb.
Rakus.az xəbər verir ki, artıq ikinci gündür Türkiyənin Suriyanın şimalına etdiyi hücumlar dünya boyu geniş qınağa səbəb olub. Sərhəd bölgələrinin sakinləri çərşənbə günü piyada, avtomobillər və rikşalarla bölgəni tərk etməyə çalışıb.
Bu qorxunc ssenari bir neçə il əvvəl bu bölgədə İŞİD-in dəhşətlərindən qaçan şəhər və kənd sakinlərinə tanışdır.
Kürdlərin başçılıq etdiyi qrup və suriyalı fəallar ağır döyüşlərə baxmayaraq, Türkiyə ordusunun bir o qədər də irəliləyiş əldə etmədiyini bildirib. Lakin onların iddiaları müstəqil olaraq təsdiqlənməyib və döyüşlərin getdiyi ərazilərdə vəziyyəti qiymətləndirmək çətin olub.
Türkiyə Müdafiə Nazirliyinin açıqlamasında hücumlar barədə ətraflı məlumat verilməsə də, ordunun fəaliyyərdə olan videosu paylaşılıb. Nazirlik hücumlar başlayandan bəri Türkiyə təyyarələri və artilleriyasının Fərat çayının şərqindən Suriyadakı 181 hədəfi nişan aldığını bildirib.
ABŞ Prezidenti Donald Tramp “Tvitter” səhifəsində yazıb ki, Türkiyə kürdlərə qarşı hücumu uzun zamandır planlaşdırırdı: “Onlar daim müharibədə olacaq. Bizim hücum bölgəsində nə əsgərimiz, nə də ordumuz var. Mən “sonsuz” müharibəyə son qoymaq istəyirəm”.
Prezident həm də Türkiyəyə xəbərdarlıq edib ki, “qanunlar çərçivəsində hərəkət etməsə, sanksiyaların ciddi zərbəsi ilə üzləşəcək.
Bu arada, BMT-nin Təhlükəsizlik Şurasında Türkiyənin hücumuna dair növbədənkənar toplantı keçirilib.
Bu məsələdə ABŞ prezidenti və Konqresin respublikaçı üzvləri arasında fikir ayrılıqları dərinləşməkdədir.
Prezidentin Suriya siyasətini gündəmə gətirən qanunvericilər Suriyada kürd döyüşçülərə qarşı hücuma keçən Türkiyəyə “sarsıdıcı” sanksiyaların tətbiqini təklif edib.
Respublikaçı senator Lindsi Qrem və onun demokrat həmkarı Krin Ban Hollen Türkiyəyə qarşı ölçüləri açıqlayıb.
Onlar Prezident Rəcəb Tayyib Ərdoğan da daxil edilməklə, Türkiyənin yüksək səlahiyyətli rəsmilərinə qarşı sanksyalar tətbiq etməklə yanaşı, Rusiyadan S-400 raketlərdən müdafiə sistemi alan Türkiyənin cəzalandırılması və Türkiyə rəsmilərinə viza məhdudiyyətlərinin qoyulmasını təklif edib.
Bundan əlavə, Türkiyədə hərbi alqı-satqı həyata keçirən fərdlərə sanksiya tətbiq edilməsi, Amerikanın Ankaraya hərbi yardımının dayandırılması və Ərdoğanın kapitalı və aktivləri haqda hesabat hazırlanması tələb olunub.
