Yerin, göyün bir quşu var, qardaşım…
Ardanış kənd orta məktəbinin müəllimi, şair Rəşid Əhmədovun yaradıcılığından bir şeri Rakus.az oxuculara təqdim edir:
“Yerin, göyün bir quşu var, qardaşım,
Hələ qanad çalır başının üstə.
Torpağının üstə, daşının üstə,
Hələ neçə illər qanad çalacaq.
Uçacaq keçdiyin yollar boyunca,
Keçdiyin yollardan doymayacaqdır.
Ayağına dəyən daşlar sayınca
Ağır günlərinə lələk salacaq.
Döydüyün qapılar açılmayanda
Yuvasız quşlara qarışmaq olmur.
İçindəki səsin ucalmayanda
Bir xoş xəbəri də danışmaq olmur.
Nə yaxşı uşaqkən yuvasız qalmış
Ətbala bir quşa yuva qurubsan,
Yazan, qara baxtı qara yazanda,
Əllərini yerdən, göydən üzəndə
Başını qaldırıb, başının üstə,
Şahlıq quşunu yox, onu görübsən.
İnsanlar içində söyləmədiyin,
Sirri də o quşdan gizləyəmməzsən –
Bir quş yuvasının nağılı olar,
Nağılın sonunu gözləyəmməzsən.
Yerin, göyün bir quşu var, qardaşım,
Yarıinsan kimi, yarıquş kimi.
Böyüdər körpəcə balalarını,
Uyudar körpəcə balalarını.
Səni də, onu da yatmağa qoymaz
Yarıinsan dərdi, yarıquş dərdi”.
