Mədəni 10.09.2020 12:11

Güney Azərbaycan ziyalıları AYB-yə müraciət etdilər - VİDEO

Ölçü

A+ A- A

Güney Azərbaycan ziyalılarının “İrəvan Çuxuru” havası ilə bağlı Azərbaycan Respublikası Yazıçılar Birliyinin Güney Azərbaycan Ədəbiyyatı şöbəsinin rəhbəri hörmətli Sayman Aruza müraciət ünvanlayıblar.

Rakus.az həmin müraciəti diqqətinizə çatdırır:

“Mövzu: İrəvanda və Ermənistan ərazisində olan Azərbaycanın tarixi-mənəvi sərvətlərinin YUNESCO tərəfindən Azərbaycanı tarixi- mədəni -mənəvi sərvətləri kimi tanınması zərurəti.

Hörmətli Sayman müəllim,

Ermənistan ərazisi və onun paytaxtı İrəvan bizim tarixi topraqlarımızdır və biz azərbaycanlılar bu tarixi topraqlara mütləq şəkildə qayıtmalıyıq. Bu, bizim Azərbaycanlı olaraq siyasi və strateji hədəfimizdir. Ona görə də tədricən bu hədəfə yaxınlaşmalıyıq. Əslən Təbrizdən olan məşhur tarixçi-alim Səməd Sərdarniya “İrəvan, Müsəlmanların yurdu idi” kitabında belə yazır:

“İrəvan müslumanlar yurdu olub və belədə qalmalıdır.”

Həmçinin Sərdarniya “Azərbaycan tarixi”, “Qarabağın tarixi” və “Arazın iki tayında müsəlman Türklərin soyqırımı” kitablarında əsaslı şəkildə bu məsələyə toxunub ki, indiki Ermənistan və onun paytaxtı hesab edilən İrəvan Azərbaycan Türklərinin tarixi torpağı olubdur. İrəvan və ətraf rayonlarının azərbaycanlılara məxsus olan adət və ənənələri bu gün də istər şeir, istər mahnılarda, istərsə də aşıqlarımızın dilində və sazlarında yaşamaqdadır. Məşhur “İrəvan çuxuru” və “Göyçə gölü” havaları Güney Azərbaycanda daim sevilən və səslənən mahnılardandır.

Azərbaycan Respublikasının Prezidenti, hörmətli İlham Əliyevin siyasi məfkurəsi, Səməd Sərdarniya kimi tarixçilərimizin sonsuz faktları, Azərbaycan xalqının istəyi və arzusu şükürlər olsun ki, vahid ideya və məqsədə xidmət edir. Bu gün dünyada yaşayan bütün soydaşlarımız Azərbaycan dövləti və Prezidentinin yürütdüyü siyası-ictimai xətti dəstəkləyir. Ona görə də biz, Güney Azərbaycanda yaşayan bir qrup ziyalı qeyd etdiyimiz vacib məqamları əsas götürərək iddia edirik ki: tarixi torpağımız olan İrəvan Azərbaycana geri qaytarılmalıdır.

Biz İranda yaşayan Azərbaycanlı yazarlar və ozanlar bu təklifi irəli sürərək “İrəvan çuxuru” havasını da eyni “Sari gəlin” mahnısı kimi Azərbaycan mədəniyyətinin mənəvi sərvəti kimi dünya səviyyəsində tanınmasını xahiş və tələb edirik.

“İrəvan çuxuru” havası bizim mədəni irsimisdir. Bu havanın YUNESCO-nun Qeyri maddi-mədəni irs siyahısına salınması günün zərurətidir. Həmçinin bu məsələ Azərbaycan Respublikasının Qarabağla bağlı tutduğu mövqeyində nə dərəcədə haqlı olduğunu bir daha dünya ictimaiyyətinin diqqətinə çatdıracaqdır.

Ona görə də “İrəvan çuxuru” havasının YUNESCO tərəfindən Azərbaycanın qeyri maddi- mədəni irsi olaraq qəbul edilməsinə köməklik göstərməyinizi Sizdən xahiş edirik!