Prezidentin istefası qəbul edildi
Əlcəzairin Konstitusiya Şurası ölkə prezidenti postunu vakant elan edib.
Rakus.az xəbər verir ki, Konstitusiya Şurasının iclası ölkənin əsas qanununun 102-ci maddəsinə uyğun olaraq keçirilir. Həmin maddəyə əsasən, respublika prezidentinin istefası və ya ölümü zamanı şura tam heyətlə yığılır və prezident vakansiyasını təsdiqləyərək parlamentə göndərir. Bundan sonra Xalq Şurasının (yuxarı palata) sədri 90 gündən çox olmayaraq dövlət başçısı vəzifələrinin icrasına başlayır. Həmin müddət ərzində ölkədə prezident seçkiləri təyin olunur və keçirilir. Bununla yanaşı, prezident vəzifələrini icra edən şəxs ali dövlət postuna namizədliyini irəli sürə bilməz.
Beləliklə, 2002-ci ildən Xalq Şurasına rəhbərlik edən 77 yaşlı Əbdülqadir Bensaleh Əlcəzairin müvəqqəti prezidenti olacaq.
Xatırladaq ki, aprelin 2-də Əbdüləziz Buteflika uzun sürən xalq etirazı və ordunun təzyiqi altında istefa barədə qərar qəbul edib və bununla bağlı Konstitusiya Şurasına ərizə verib. O, 1999-cu ildən indiyədək Əlcəzairin prezidenti olub. 2013-cü ilin yazında ağır insult keçirib. Səhhətində yaranan problemlərdən sonra nadir hallarda ictimaiyyət qarşısına çıxıb. Ərəb dünyasının ən təcrübəli siyasətçilərindən olan Buteflika əlil arabası ilə hərəkət edir və müalicə məqsədilə tez-tez xarici ölkələrə gedir.
