“Bir əsrin xəzinəsi – Bakı Dövlət Universiteti 100 il” kitabının təqdimatı oldu - FOTO
Noyabrın 15-də Bakı Dövlət Universitetində (BDU) siyasi elmlər üzrə fəlsəfə doktoru Günel Məliklinin “Bir əsrin xəzinəsi – Bakı Dövlət Universiteti 100 il” kitabının təqdimat mərasimi keçirilib.
Rakus.az xəbər verir ki, professor və müəllimlərin, mütəxəssislərin iştirak etdikləri tədbirdə BDU-nun professoru İzzət Rüstəmov Prezident İlham Əliyevin “Bakı Dövlət Universitetinin 100 illik yubileyinin keçirilməsi haqqında” Sərəncamının əhəmiyyətindən bəhs edib.
Müsəlman Şərqinin ilk ali təhsil ocağı olan universitetin uğurlu və şərəfli yol keçdiyini qeyd edən alim “Bir əsrin xəzinəsi – Bakı Dövlət Universiteti 100 il” kitabının nüfuzlu təhsil ocağı haqqında dəyərli mənbə olduğunu vurğulayıb.
Nəşrin müəllifi Günel Məlikli Bakı Dövlət Universitetinin elm və təhsilin inkişafındakı müstəsna rolundan danışıb. Qeyd olunub ki, təqdim olunan kitabda Bakı Dövlət Universitetinin tarixi, inkişaf mərhələləri, fəaliyyəti, həmçinin onun elm və təhsilə verdiyi əvəzsiz töhfələr barədə ətraflı məlumat verilib.
Milli Məclisin Əmək və sosial siyasət komitəsinin sədri Hadı Rəcəbli Bakı Dövlət Universitetinin nüfuzlu elm və təhsil mərkəzi olduğunu deyib, təqdim olunan kitabın əhəmiyyətini vurğulayıb.
Digər çıxış edən alimlər də “Bir əsrin xəzinəsi – Bakı Dövlət Universiteti 100 il” kitabı ilə bağlı fikirlərini bildiriblər.
