Bakıda narkoşəbəkənin üzvləri saxlanılıblar - FOTO
Baş Narkotiklərlə Mübarizə İdarəsinin əməkdaşları paytaxt ərazisində narkotik vasitələrin qanunsuz dövriyyəsi və satışı ilə məşğul olan daha bir narkoşəbəkənin üzvlərini saxlayıblar.
Rakus.az xəbər verir ki, Daxili İşlər Nazirliyinin mətbuat xidmətindən bildiriblər ki, Xətai rayonunun Köhnə Günəşli qəsəbəsində keçirilən əməliyyat zamanı əvvəlcə qəsəbə sakini Solmaz Salmanova saxlanılıb. Onun üzərində şəxsi axtarış aparılan 13,141 qram heroin aşkarlanaraq götürülüb.
Solmaz Salmanovanın tutulana qədər yaşadığı qəsəbə ərazisində narkotik vasitələrin satışı ilə məşğul olduğu müəyyənləşib. O, ifadəsində heroini Şövqi və Nicat adlı şəxslərdən aldığını bildirib.
Baş İdarə əməkdaşları tərəfindən əməliyyat tədbirləri davam etdirilərək şəbəkənin digər üzvləri – dəstənin başçısı, Rusiya Federasiyası vətəndaşı Şövqi Babayev və onun yaxın qohumu Bakı şəhər sakini, əvvəllər məhkum olunmuş Nicat Quliyevn də polislər tərəfindən tutulublar. Nicat Quliyev saxlanılan zaman onun üzərindən 21,699 qram çəkidə heroin aşkarlanıb. Şövqi Babayevin üzərində şəxsi axtarış aparılan zaman isə külli miqdarda – 107,806 qram heroin, 101,501 qram qurudulmuş marixuana, 39,855 qram psixotrop maddə metamfetamin və elektron tərəzi aşkarlanaraq götürülüb.
İstintaq zamanı Şövqi Babayevin əldə etdiyi narkotik vasitələrin satışını Solmaz Salmanova və Nicat Quliyev vasitəsilə təşkil etdiyi müəyyənləşib. Faktla bağlı hər üç şəxs barəsində Cinayət Məcəlləsinin müvafiq maddələri ilə cinayət işləri başlanıb və onların barələrində məhkəmənin qərarı ilə həbs qətimkan tədbirlərii seçilib, istintaq əməliyyat tədbirləri davam etdirilir.
