Britaniyada rəsm əsərinin ölkədən çıxarılmasına qadağa qoyuldu
Böyük Britaniyanın Mədəniyyət nazirliyi ingilis rəssam Tomas Qeynsboronun (1727-1788) “Going To Market, Early Morning” (“Bazara gedərkən. Səhər tezdən”) rəsm əsərinin 2020-ci ilin mart ayınadək ölkədən çıxarılmasına qadağa qoyub.
Rakus.az xəbər verir ki, atla bazara gedən kəndlilərin təsvir olunduğu panoramlı peyzaj iyul hərracında 8 milyon funt-sterlinqə (10,3 milyon dollar) satılıb. Qadağa əsərin adı açıqlanmayan hazırkı sahibinin rəsmi xaricə aparmaq üçün müvafiq icazə ilə bağlı müraciətindən sonra qoyulub.
Britaniyanın Mədəniyyət nazirinin müavini Helen Ueytli bunun Birləşmiş Krallıq üçün böyük itki ola biləcəyini deyib və həmin müddət ərzində şedevr üçün britaniyalı alıcının tapılacağına ümid etdiyini vurğulayıb.
Xatırladaq ki, bundan öncə oxşar qadağa britaniyalı romantik peyzaj ustası Uilyam Ternerin (1775-1851) “The Dark Rigi, The Lake of Lucerne” (Tutqun Rigi dağı, Lucern gölü) rəsm əsərinə də qoyulmuşdu. Həmin əsər 10 milyon funt-sterlinq (12,9 milyon dollar) dəyərində qiymətləndirilir.
