Bu gün İsa peyğəmbərin (ə) mövlududur
Xristian dininin əksər qolları və əksər islam alimləri İsa peyğəmbərin (ə) miladdan əvvəl 4-6 -cı illərdə dekabrın 25-də Fələstinin Beyt-Ləhm şəhərində dünyaya gəldiyini deyirlər.
Rakus.az xəbər verir ki, xristian aləmində qəbul edilmiş iki təqvim yəni Qriqorian və Yulian təqvimlərinə əsasən, İsa peyğəmbərin (ə) doğum günü iki fərqli gündə keçirilir. Lakin əksəriyyət doğum gününün bu günə təsadüf etdiyi qənaətindədir.
İsa peyğəmbərin (ə) həyatı bütün insanları, eləcə də müsəlmanları heyrətləndirir. Onun doğum anlarında baş verən qeyri-adi hadisələr və möcüzələr daha çox Qurani-Kərimdə təsvir olunub. Müqəddəs kitabda İsanın (ə) beşikdə ikən dil açıb insanlarla danışması qeyd edilir.
Xatırladaq ki, bu, xristianların müqəddəs kitabı olan İncildə kifayət qədər geniş göstərilməyib. Quranın “Məryəm” surəsində İsa peyğəmbərin (ə) dünyaya gəlişindən geniş danışılır. Kitabda Onun öz elçiliyini sübuta yetirmək üçün göstərdiyi möcüzələr, verdiyi şəfalar və duaları əks olunur. İsa peyğəmbər (ə) haqqında Qurani-Kərimdə olduğu qədər heç bir mənbədə məlumat yoxdur.
Bütün bunlara baxmayaraq, müsəlmanlar İsanı (ə) Allahın peyğəmbəri kimi tanıyır, onun Allahın oğlu olmasını əsla qəbul etmirlər.
İsa peyğəmbərin (ə) doğum günündə çoxsaylı xristian və müsəlman zəvvar Onun doğulduğu Beyt-Ləhmə gedir.
Bu şəhər hazırda Fələstində yerləşən Vifleym şəhəridir. Bu məkan 2 eradır ki, dünya xristianlarının müqəddəs məkanıdır və hər il burada İsa Peyğəmbərin (ə) doğum günü qeyd edilir.
Ötən gecə bu şəhərdə doğum günü münasibətilə keçirilən tədbirdə dünya xristianları, xüsusilə də fələstinli xristianlar fəal iştirak edib, bayram tədbirləri keçirib. Bayram tədbirinə Fələstin rəsmiləri də qatılıblar. (salamnews.org)
