Karantin qaydaları ilə bağlı ən son MƏLUMATLAR
Daxili İşlər Nazirliyinin (DİN) Baş İctimai Təhlükəsizlik İdarəsinin rəis müavini Əziz Baqişev ATV telekanalında yayımlanan “ATV Qərargah” verilişində karantin qaydaları ilə bağlı ən son məlumatları açıqlayıb.
Rakus.az xəbər verir ki, o, rayondan Bakıya tibbi müayinəyə gəlməyin şərtləri barədə danışaraq bildirib ki, Bakıya tibbi müayinəyə gəlmək istəyən şəxsləri iki nəfər müşayiət edə bilər. Rayonda yaşayan şəxslər yaşadıqları yerlərdəki tibb müəssisəsindən bildiriş almaqla Bakıya xəstəxanaya gələ bilərlər. Şəxslər qeydiyyatda olduğu rayon mərkəzi xəstəxanasından göndəriş vərəqəsi almalıdır. Bu şəkildə Bakıya tibbi müayinəyə gələ bilər. Eyni zamanda, müayinədən keçməyə gələn şəxsləri iki nəfər yaxın qohumu müşayiət edə bilər. Əsas şərt müşahidə edən şəxslərin yaşının 65-dən yuxarı olmamasıdır”.
SMS icazə müddəti bitən vətəndaşlara güzəşt varmı?
Onun sözlərinə görə, yollarda heç bir tıxac olmadığından vətəndaş bu müddət ərzində öz işlərini sərbəst yerinə yetirə bilir: “Xüsusi karantin rejimi qaydalarına görə, vətəndaşlara küçəyə çıxması üçün üç saat icazə verilir. Ola bilər ki, həkim müayinəsi zamanı üç saatlıq icazə müddəti bitər. Bu halda şəxs həkim arayışı əsasında rahat yaşayış yerinə qayıda bilər. Digər hallarda isə vəziyyətə uyğun qərar verilir. Üç saat tamam olubsa, 5-10 dəqiqə gecikmə varsa, evləri 50 metr aralıdadırsa, bu halda güzəşt edilir.
Ümumiyyətlə, polis əməkdaşlarının vəzifəsi vətəndaşları cərimələmək yox, onların sağlamlıqlarını qorumaqdır. Bunu birmənalı şəkildə bilmək lazımdır”.
Postların sayı azalmayıb, yerləri dəyişdirilib
O bildirib ki, DİN-in bütün orqanları xüsusi karantin dövründə gücləndirilmiş iş rejimində çalışır: “Paytaxt ərazisində postların sayı azalmayıb. Sadəcə olaraq, postların yerləri nəqliyyat vasitələrinin intensiv hərəkətinə uyğun olaraq müvafiq qaydada dəyişdirilib. Bununla yanaşı, Bakı, Sumqayıt, Abşeron, Gəncə və Lənkəranda da xüsusi karantin qaydaları çərçivəsində hüquq-mühafizə orqanlarının fəaliyyəti mayın 31-dək eyni qaydada davam etdiriləcək”.
DİN rəsmisindən obyekt sahiblərinə ÇAĞIRIŞ
“Hər bir obyektdə iş başlayanda və yekunlaşdırılanda dezinfeksiya işləri aparılmalıdır. Restoranlarda masalar arası məsafə iki, stullar arası isə bir metr olmalıdır: “Bərbərxanalarda, gözəllik salonlarında da işçilər və müştərilər tibbi maskalardan istifadə etməlidirlər. Karantin qaydalarına riayət etmək hər bir vətəndaşın borcudur. Bir nəfərin bu qaydaları pozması həm özü, həm də digər şəxslər üçün risk olur. Bu səbəbdən insanlar arasında yoluxmaların sayını azaltmaq üçün metodiki göstərişlərə əməl etmək lazımdır”, – DİN rəsmisi vurğulayıb.
Qaydaları pozan 20 ictimai iaşə obyekti cəzalandırıldı
“Bakı, Sumqayıt, Abşeron, Gəncə və Lənkəranda restoranların fəaliyyəti karantin müddəti bitənədək qadağandır. Təəssüf ki, monitorinqlər zamanı karantin qaydalarını pozaraq, qanunsuz fəaliyyət göstərən obyektlər müəyyən edilib. Sözügedən şəhərlərdə qaydaları pozaraq, fəaliyyət göstərən 20-yə yaxın ictimai iaşə obyekti müəyyənləşib. Obyekt sahibləri haqqında inzibati qaydada tədbirlər görülüb”.
