Floydun ölümü- Trampın səfərbərlik çağrışı – TƏHLİL - FOTO
AĞ EV – Zorakı nümayişçilərin “ölkədaxili terror aktları” törətdiyini deyən ABŞ Prezidenti Donald Tramp bazar ertəsi axşam “ölkə boyu yayılan özbaşınalığa və iğtişaşlara son qoyacağını” vəd edib.
Rakus.az xəbər verir ki, Tramp deyib ki, o, “qanuna riayət edən amerikalıların hüquqlarını qorumaq, dağıntı və yanğınlara son qoymaq, iğtişaşları və qarətləri dayandırmaq naminə mülki və hərbi bütün mümkün federal resurslardan” istifadə edəcək.
Prezident danışmazdan bir neçə dəqiqə öncə Ağ Evin Qızılgül Bağında toplaşmış jurnalistlər yaxınlıqdakı Lafayette Parkında iğtişaş polisinin atdığı gözyaşardıcı qaz partlayışlarının səslərini eşidiblər.
Parkda əllərində qalxanlar tutmuş iğtişaş polisi dinc nümayişçiləri geri itələyib.
Rezin güllələrdən istifadə olunub və süvari polis əraziyə cəlb olunub.
İğtişaş polisi hərəkətə komendant saatı 19:00-da qüvvəyə minməzdən yarım saat öncə keçib.
Ağ Evdən bir qədər aralıda yerləşən Sent Con kilsəsinin ətrafı nümayişçilərdən təmizləndikdən az sonra Tramp kilsəyə doğru addımlayaraq taxta lövhələrlə örtülmüş kilsənin qarşısında əlində İncil tutub.
Bazar günü axşam ABŞ prezidentlərinin adətən getdikləri Yepiskop kilsəsinin zirzəmisində yanğın törədilib.
“Əgər şəhər, yaxud ştatlar öz sakinlərinin həyat və mülkiyyətini qorumaq üçün lazımi addımlar atmaqdan boyun qaçırırsa, onda mən Birləşmiş Ştatlar hərbi qüvvələrini cəlb edərək onlar üçün problemi həll edəcəyəm”, – Tramp Qızılgül Bağındakı bəyanatında Üsyan Aktına eyham vurub.
1807-ci ildə qəbul edilmiş qanun fövqəladə hallarda prezidentə iğtişaşları yatırmaq səlahiyyətləri verir.
“Prezident Trampın ‘Üsyan Aktına’ istinad etmək qərarı və onun qızışdırıcı ritorikası sübut edir ki, o bizə təlatümlü vaxtlarda rəhbərlik edə və ölkəni birləşdirə bilməz. Əvəzində o, təhlükə hesab etdiyi kəslərə qarşı qüvvədən istifadə etməyə qərar verib,” deyə Konqresdə Silahlı Qüvvələr Komitəsinin sədri Adam Smit (D) bildirib.
Prezident Orduya hərbi polis batalyonlarını Vaşinqtonda yerləşdirmək göstərişi verib. Xüsusi statuslu Kolumbiya Mahalı adlanan paytaxt Vaşinqton yeganə məkandır ki, hərbi qüvvələr burada ştat qubernatoru ilə məsləhətləşmədən yerləşdirilmə səlahiyyətinə malikdir.
Trampın son addımı o, üç il yarım öncə prezident olduqdan bəri ən aşkar əzələ nümayişi kimi dəyərləndirilir.
“Biz diktaturanın astanasındayıq,” deyə CNN teleaprıcısı Don Lemon Trampın bəyanatından az sonra bidirib. “Hesab edirəm ki, prezident burada çox, çox təhlükəli bir oyun oynayır.”
Günün əvvəlində Tramp və yüksək rütbəli administrasiya rəsmiləri ştat qubernatorlarını etirazçılar qarşısında zəiflik göstərməkdə ittiham ediblər.
Tramp qubernatorları və şəhər merlərini əllərində olan hərbi resurslardan istifadə etməməkdə günahlandırıb.
Digər tərəfdən Tramp afro-amerikalı Corc Floydun polis rəftarı nəticəsində ölməsindən sonra baş qaldıran qəzəb dalğasının qarşısını almaq üçün təskinçi ton sərgiləməməkdə ittiham olunur.
ABŞ boyu nümayişlər ötən çərşənbə axşamından bəri 46 yaşlı Corc Floydun Minneapolisdə polis zabiti tərəfindən öldürülməsindən sonra baş qaldırıb.
Nümayişçilər polisin qaradərili qadın və kişilərə qarşı qəddar rəftarına etiraz etməklə yanaşı ABŞ-da sistematik iqrçiliyə qarşı çıxıb.
Floydun ölümünə səbəb olan Minnesota ştatının polis zabiti Derek Çauvin 3-cü dərəcəli qətl ittihamı ilə həbs edilib.
