Bakıda yenə postlar qoyuldu
Xüsusi karantin rejiminin sərtləşdirilməsi ilə bağlı Bakı şəhərinin inzibati ərazisini əhatə edəcək sayda müvəqqəti postlar qurulub.
Rakus.az xəbər verir ki, Bakı Şəhər Baş Polis İdarəsinin Dövlət Yol Polisi İdarəsinin bölmə rəisi, polis polkovniki Vaqif Əsədov bildirib ki, paytaxtda bütün küçə və prospektlər tərəfimizdən tam nəzarətə götürülüb, polis gücləndirilmiş iş saatı ilə xidmətini davam etdirir.
Paytaxtın müxtəlif ərazilərində qurulan müvəqqəti postlarda yol polisi əməkdaşları avtomobilləri saxlayaraq icazələrinin olub-olmamasını yoxlayırlar.
“Yol polisi sakinlərdən, hərəkət iştirakçılarından xahiş edir ki, özlərini qorusunlar, pandemiyanın qarşısını birgə alaq. Çünki biz birlikdə güclüyük. Məqsəd vətəndaşlara qarşı inzibati tənbeh tədbirlərinin görülməsi deyil, nizam-intizama dəvət etməkdir. Yəni bu gün vətəndaş-polis münasibətlərinin yüksək səviyyədə təşkil edilməsi və eyni zamanda profilaktiki tədbirlərin keçirilməsi nəzərdə tutulubsa, deməli, bu bir mənalı həyata keçirilməlidir. Ümid edirik ki, hər zaman olduğu kimi, bu karantin dövründə də vətəndaşlar polis əməkdaşları ilə öz həmrəyliklərini nümayiş etdirəcəklər”, – deyə V.Əsədov bildirib.
Sərtləşdirilmiş karantin rejimi qaydalarını pozan şəxslər aşkarlandıqda onlar Azərbaycan Respublikası İnzibati Xətalar Məcəlləsinin müvafiq maddələri ilə inzibati məsuliyyətə cəlb olunurlar.
Xatırladaq ki, Nazirlər Kabinetinin Bakı, Sumqayıt, Gəncə, Lənkəran, Yevlax, Masallı, Cəlilabad şəhərlərinin və Abşeron rayonunun ərazisində xüsusi karantin rejiminin sərtləşdirilməsi ilə bağlı əlavə tədbirlər barədə müvafiq Qərarına əsasən, iyunun 21-i saat 00:00-dan iyulun 5-i saat 06:00-dək həmin ərazilərdə məhdudiyyətlər tətbiq olunacaq.
