İspaniya və İtaliyada yoluxma və ölüm azalır
Avropada COVID-19 pandemiyasının iki əsas mərkəzi olan İspaniya və İtaliyada son iki həftə ərzində koronavirusa yoluxanların və virusdan ölənlərin sayı getdikcə azalmaqdadır.
Rakus.az xəbər verir ki, məlumata görə, aprelin 13-də İspaniyada 517 nəfər koronavirusun qurbanı olub. Bir gün öncə isə bu say 510 nəfər idi. Bunlar martın 25-dən bəri, başqa sözlə son 17 gündə ən aşağı göstəricilərdir.
İtaliyada bazar ertəsi 567, bir gün əvvəl isə 431 nəfər virusdan ölüb və bu, martın 21-dən bu yana ən aşağı göstərici olub. Epidemiyanın pik nöqtəsində bu ölkələrdə gündə, demək olar, min nəfər ölürdü. Məsələn, martın 28-də İtaliyada 971 nəfər infeksiyadan ölüb. İspaniyada aprelin 3-ü və 4-ü tarixlərində uyğun olaraq 950 və 932 nəfər ölüb. Ümumilikdə İspaniyada təxminən 18 min, İtaliyada isə 20 mindən çox adam virusun qurbanı olub.
Bu ölkələrin səhiyyə sistemləri hələ də çox yüklənir. Bundan əlavə, İspaniyada təsdiqlənmiş xəstəliklərin 15%-i tibb işçilərinin payına düşür. İtaliyada artıq 100-dən çox həkim koronavirusdan ölüb. Lakin aprelin 4-də pandemiya başlayandan bəri ilk dəfə reanimasiya şöbələrində xəstələrin sayı azalıb. Bənzər dinamika İspaniyada da müşahidə olunur: aprelin əvvəllərindən etibarən orada ağır xəstələrin sayı artmır (orta hesabla belə xəstənin sağalması üçün iki-üç həftə süni nəfəs aparatında qalmaq lazım gəlir: uzun reabilitasiya SARS-CoV-2 virusuna yoluxmanın xüsusiyyətlərindən biridir).
Son iki-üç həftə ərzində hər gün aşkar olunan yeni halların sayı azalır. İspaniyada pik nöqtə aprelin 1-də olub: gün ərzində 9 222 nəfərdə virus aşkarlanıb. Aprelin 13-də 3 777 yeni yoluxma hadisəsi qeydə alınıb. İtaliyada pik nöqtə martın 22-də olub – 6 557 nəfər xəstələnib. Bazar ertəsi ölkədə 3 153 hal müəyyən edilib.
Bu günlərdə İspaniyada 2 336, İtaliyada isə 1 224 nəfər sağalıb.
