Ağ ciyərdən bir gecədə iki nəfər öldü - FOTO
Bu gün Ağ Ciyər Xəstəlikləri İnstitutunda iki ölüm hadisəsi baş verib.
Rakus.az xəbər verir ki, xəstəxanada müalicə alan Binəqədi rayon sakini 1985-ci il təvəllüdlü Qəniyev Rəşad və Lerik rayon sakini 1978-ci il təvəllüdlü Qafarov Azad dünən səhər saatlarında qanaxmadan dünyalarını dəyişiblər.
Xəstələrin yaxınları ölüm səbəbini həkim səhlənkarlığı ilə əlaqələndiriblər.
Tibbi Ərazi Bölmələrini İdarəetmə Birliyindən (TƏBİB) APA-ya verilən xəbərə görə, hadisə barədə məlumatlıdırlar. Hazırda bununla bağlı araşdırma gedir.
Ağciyər Xəstəlikləri İnstitutunun yeni direktoru Həqiqət Qədirova Unikal.org-a açıqlamasında bildirib ki, ağır xəstələrin ölməsi normal hadisədir:
“Bu məlumatı hansısa yaramaz bir senssasiya kimi sizə ötürüb. Belə ölüm hadisələri olur. Amma bu o demək deyil ki, onlara baxış yoxdur. Onlar hər ikisi ağır xəstə olublar. Bizdə ölüm komissiyası var. Bunların da ölüm səbəbləri araşdırılacaq. Onların hansı səbəbdən ölümlərini isə sizə deyə bilməyəcəm. Bu həkim sirri məsələsidir”.
Xatırladaq ki, noyabrın 25-də sözügedən xəstəxanada 31 yaşlı Bağırova Rəhimə Tofiq qızı da vəfat edib.
