Almaniyada neonasist şəxs mer seçildi
Almaniyanın Hessen vilayətindəki kiçik Faldsiedlunq şəhərinə neonasist şəxsin mer seçilməsi aparıcı siyasi partiyaları qəzəbləndirib.
Rakus.az xəbər verir ki, neonasist Stefan Yadş sağ təmayüllü Nasional Demokratik Partiyasından (NDP) Frankfurt Mayn yaxınlığında yerləşən şəhərin yeddi bələdiyyə üzvü tərəfindən mer seçilib. Cəmi 2 650 nəfər sakini olan bu şəhərdə keçirilən seçkilərdə onun rəqibi olmayıb. NDP bu seçkinin qarşısını almaq istəsə də, məlum olub ki, bu addım ölkə Konstitusiyasına ziddir.
Qeyd olunur ki, Kansler Angela Merkelin Xristian Demokrat İttifaqı (CDU), onun koalisiya tərəfdaşı, sol təmayüllü Sosial Demokrat Partiyası (SPD) və liberal Azad Demokratlar Partiyasının şəhərdəki təmsilçiləri də neonasist namizədi dəstəkləyiblər.
Faldsiedlunq şəhərinə yaxın olan Altenstadtda SPD-nin lideri Markus Brando bildirib ki, NDP-nin neonasist namizədi seçkilər zamanı burada olan boşluqdan istifadə edib. Lakin partiyaların liderləri daha sərt mövqe nümayiş etdirərək seçkinin nəticələrini qətiyyətlə pisləyiblər. CDU-nun lideri Anneqret Kramp-Karrenbauer səsvermənin nəticələrinin ləğvinə çağırıb. Partiyanın baş katibi Pol Zyemyak isə bildirib ki, konstitusiya əleyhinə fəaliyyət göstərən şəxsin mer seçilməsi qanuna ziddir. SDP-nin baş katibi Lars Klinqbeyl isə deyib: “SDP-nin mövqeyi qətidir. Biz nasistlərlə əməkdaşlıq edə bilmərik! Heç bir vaxt! Bu, federal, regional və rayon səviyyələrində də mümkün deyil. Bu vəziyyət dərhal düzəldilməlidir”.
Neonasist mer isə bildirib ki, o, şəhər sakinlərinin maraqlarına xidmət edəcək və bütün partiyaların təmsilçiləri ilə əməkdaşlıq şəraitində fəaliyyət göstərəcək.
