“Azərbaycan dövlətçiliyinin tarixi Urmu gölü ətrafından 4200 il əvvəldən başlayır” - VİDEO

Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında “4000 il öncə olan qədim yazılarda türk adı “turuk” kimi qeyd olunub” adlı veriliş hazırlanıb.

Rakus.az xəbər verir ki, verilişdə türkoloq, filologiya elmləri doktoru, professor Firudin Cəlilov türk və Azərbaycan millətinin tarixi və dövlətçiliyindən danışıb.

O bildirib ki, bizə monqoloid damğası yapışdırırlar: “Altay nəzəriyyəsi qondarmadır, türklər Altaydan gəlmə deyil. Bizim koreyalı, yapon, monqollarla qohumluğumuz yoxdur. Urmu nəzəriyyəsi türklərin Azərbaycanın ən qədim əhalisi olduğunu sübut edir. İlk Azərbaycan dövləri 4200 il bundan öncə qurulub. Azərbaycan dövlətçiliyinin tarixi Urmu gölü ətrafından 4200 il əvvəldən başlayır. İlk Azərbaycan dövlətində hakimiyyət varisliklə deyil, seçki ilə dəyişirdi”.

Onun sözlərinə görə, İranın təsiri ilə Yaz bayramının adı Novruz kimi qeyd olunur: “Yaz bayramı nə Avestada, nə də Əhəməni mənbələrində var. Sasanilərə qədər farslar Yaz bayramından xəbərsiz idilər. Urartu mixi yazılarında azərbaycan türkcəsində sözlər üstünlük təşkil edir.

Professor deyib ki, Qut dövləti türk törəsinin əsasında 4200 il öncə Urmiyə gölü ətrafında qurulub: “Qut hökmdarlarının adı onların etnik mənşəyini sübut edir. 4000 il öncə olan qədim yazılarda türk adı “turuk” kimi qeyd olunub. Dədə Qorqudda  Dış oğuzlarla İç oğuzlar birləşdilər”.

F.Cəlilov “qalın oğuz eli qurdular”ifadəsinin mənasına da aydınlıq gətirib.

Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Veriliş aprelin 23-də saat 19:30-da Baku TV-nin efirində və saat 21:30-da YouTube kanalında yayımlanıb.