Amerikalı alimlər Trampı səbrli olmağa çağırdı
ABŞ-ın onlarla aparıcı alimi Prezident Donald Trampı nüvə silahı sınaqlarını bərpa etmək fikrindən daşınmağa çağırıb.
Rakus.az xəbər verir ki, Donald Trampa ünvanlanan məktubu imzalayan alimlər arasında 10-a yaxın “Nobel” mükafatı laureatı da var.
“Nüvə sınaqları yeni silahlanma yarışı, həmçinin qəsdən və ya təsadüfi nüvə müharibəsi riskini artıra bilər”, – 70-ə yaxın alimin dünyada ilk nüvə silahı sınaqlarının 75-ci ildönümü münasibətilə ABŞ prezidentinə ünvanladığı məktubda belə deyilir.
“Biz alimlərin həm bəşəriyyət, həm də planetimizə zərərli təsiri səbəbindən nüvə silahına qarşı ənənəvi çıxışına uyğun olaraq, ABŞ hakimiyyətini nüvə sınaqları planlarından imtina etməyə çağırırıq”, – deyə məktubda vurğulanır. Alimlər, həmçinin ABŞ-da nüvə sınaqlarının digər ölkələrə, o cümlədən KXDR, Hindistan və Pakistana bu sahədə işləri aktivləşdirmək üçün yaşıl işıq yandıracağını da qeyd ediblər.
May ayının sonlarında “The Washington Post” qəzeti ABŞ prezidenti administrasiyasının Çin və Rusiyanı çəkindirəcək siqnal qismində nüvə silahı sınaqlarının bərpa edilməsi imkanlarını nəzərdən keçirdiyini yazmışdı.
Xatırladaq ki, dünyada ilk texnoloji nüvə silahının sınağı 1945-ci il iyulun 16-da ABŞ-ın Nyu-Meksiko ştatında “Trinity” kod adı altında keçirilib.
