Ardanış orta məktəbini bitirənlər 50 il sonra görüşdülər - FOTO
Bu günlərdə Göyçə mahalının Ardanış kənd orta məktəbinin 1974-cü il buraxılşından olan bir qrup məzun və müəllimlərinin Bakı şəhərində “Laləndə” restoranında görüşü keçirilib.
Rakus.az xəbər verir ki, görüşdə o dövrdə məzunlara dərs demiş müəllimlərdən Məhəmmədəli Quliyev və Mikayıl Həsənov da iştirak ediblər. İştirakçılar məktəb illərinin bir daha xatırladıb, xatirələrini yada salıblar.
Görüşdə Mikayıl Həsənov, Məhəmmədəli Quliyev, o dövrün məzunları bu görüşü yüksək səviyyədə təşkil edən Oruc Süleymanov, aşıq Bəhmən Kazımov, Rusiyanın Sankt Peterburq şəhərindən gəlmiş Rusiya Yazıçılar birliyinin üzvü, şair Maarif Hümbətov (Arif Göyçəli), Məhəmmədəli Qasımov, İmran Kazımov, Məhluqə Həsənova, Dilbər Vəliyeva, Ceyran Rzayeva, Minayə Novruzova, Elmira Hümbətova və başqaları çıxış edərək Ardanış kənd orta məktəbi, onlara dərs deyən müəllimlər haqqında xoş xatirələr danışıblar. Onlar dünyasını dəyişmiş müəllimlərə Allahdan rəhmət diləyərək digər müəllimlərinə cansağlığı arzulayıb, orta məktəbdən maraqlı əhvalatları xatırlayaraq gövrək anlar yaşayıblar.
Natiqlər erməni vandallarının oxuduğumuz məktəbi dağıtdıqlarını, bizə aid olan tariximizi məhv etmək istədiklərini, ancaq buna nail ola bilməyəcəklərini xüsusi vurğulayıb, Ali Baş Komandanın rəhbərliyi ilə Qarabağımızın hər yerində Azərbaycanımızın üçrəngli bayrağının dalğalandığını və yaxın gələcəkdə bu bayrağın Göyçəmizdə və bütün Qərbi Azərbaycanımızda dalğalanacağına inadıqlarını bildiriblər.
Çıxış edənlər nəvə-nəticələrinin doğma kəndimizdə öz təhsilini davam etdirəcəklərinə inamlarını itirmədiklərini deyiblər.
Aşıq Bəhmən və İmran müəllim öz maraqlı ifaları ilə, şair Arif Göyçəli öz şerləri ilə görüş iştirakçılarının alqışlarını qazanıblar.
Tədbirdə xanım iştirakçılara gül buketi təqdim olunub və şair Arif Göyçəli öz kitablarını iştirakçılara hədiyyə edib.
Sonda xatirə şəkilləri çəkilib və belə möhtəşəm görüş təşkil etdiyinə görə Oruc müəllimə dərin minnətdarlıq bildiriblər.
Əli Vəliyev
