Ayşənin haqqını DİM tanıdı
Dövlət İmtahan Mərkəzindən aldığım sevindirici xəbərin təsiri altındayam. DİM jurnalistika ixtisasına qəbul üzrə keçirilmiş qabiliyyət imtahanının nəticələrindən narazı qalanlar üçün Apelyasiya Komissiyası təşkil etmişdi. Komissiyanın avqustun 5-də keçirilən iclasında maraqlı halla qarşılaşdıq. Ayşən adlı abituriyent inşa müsabiqəsindən cəmi 1 balla kəsrə qalmışdı. Münsiflərin həmin 1 bal əskiyini əsaslandırmaq üçün göstərdikləri arqumentlər sırasında qramatik səhvlərlə yanaşı “mövzuya aidiyyatı olmayan” və “abituriyentlər üçün tədris proqramı ilə uzlaşmayan ” sitatların yer tutması da var idi.
Rakus.az xəbər verir ki, bunu Jurnalistlərin Həmkarlar İttifaqının sədri Müşfiq Ələsgərli bildirib.
Qeyd edib ki, Ayşənin “səyahətə tək, yoxsa qrup halında getməyi xoşlayırsan?” mövzusu üzrə yazdığı inşada tezisləri təqribən belə idi: “qrup halında səyahət etmək həm də, yol boyunca fikir mübadiləsi aparmaq, yeni informasiyalar əldə etmək və qaynayıb-qarışmaq, sosiallaşmaq baxımından faydalıdır. Bir şəxs qrup halında səyahət etməyi, başqaları ilə ünsiyyətdə olmağı, qaynayıb qarışmağı bacarmırsa, o şəxs ailədə də uyşmazdır; ailədə uyuşmayan fərd qonşularla da uyuşmaz. Belə şəxs cəmiyyətlə də qaynayıb qarışmaz. Uyuşmaz şəxslərin sayının çoxalması cəmiyyət üçün çox problemlidir. Belə cəmiyyətlər bütövləşib vahid millət halında birləşə bilməzlər”. Ayşən öz fikirlərini əsaslandırmaq üçün Nikkolo Makiavelli, Immanuel Kant və Heydər Əliyevdən sitatlar gətirmişdi. Bənzər tezislər və əsaslandırmalar kifayət qədərdir. Ayşən həm də Nizami Gəncəvidən sitatlar gətirib. Həmçinin, modern texnologiyaların canlı ünsiyyət üçün törətdiyi fəsadlardan bəhs edib və sair.
İnana bilirsinizmi ki, bu, 11-ci sinif məzunun fikirləridir. Mən inandım. Ayşəni tam 35 dəqiqə sorğu-sual etdik. Güclü mütaliəsi, unikal yaddaşı, aydın baxışları, təfəkkürü var. İnanılmaz olsa da, dünyanın məşhur filosoflarının əksəriyyətini mütaliə edib, onların əsərlərini tanıyır və sitatlar gətirir.
Komissiya üzvləri vahid mövqedən çıxış etdik. DİM-ə müraciət edərək Ayşənin müsabiqədə iştirak haqqının tanınmasını xahiş etdik. Çox narahat idim. DİM-ə hər gün zəng vurub nəticəni soruşurdum. Nəhayət bu gün xəbər aldım ki, Ayşənin müsabiqəyə qatılması təmin edilib. O qədər rahat, o qədər sevincliyəm ki!
Sonda sədr Ayşənə uğurlar arzulayıb:
“Yolun açıq olsun, Ayşən balamız! Bu millətin sənin kimi düşüncələrə ehtiyacı var. Görünür, insan bəzən bilgisizliyinin yox, həm də çoxbilmişliyinin “əziyyətini çəkir”. Amma haqq, gec də olsa, öz yerini tapır. Sənin bu haqqını tanıdığına görə DİM-ə xüsusi təşəkürlər!”
