Azərbaycan nefti ilə dolu tanker Odessa limanına çatdı
Belarusun Mozır neft emalı zavodu üçün nəzərdə tutulmuş Azərbaycan nefti ilə doldurulmuş növbəti tanker dünən axşam saatlarında Ukraynanın Odessa şəhərinin Cənub limanına çatıb.
Rakus.az xəbər verir ki, bu barədə Belarusun “Belneftexim” konserninin mətbuat katibi Aleksandr Tişenko jurnalistlərə açıqlamasında bildirib.
Onun sözlərinə görə, 85 min ton Azərbaycan nefti ilə doldurulmuş tanker dünən axşam Cənub limanına çatıb: “Bu gün səhər yükün aşırılmasına başlanılıb. Planlaşdırırıq ki, iyulun 10-15-də artıq neft Mozır neft emalı zavoduna çatdırılacaq”.
O bildirib ki, digər tanker neft çatdırılmaları da davam etdirilir.
Ötən həftə Azərbaycan Dövlət Neft Şirkəti (SOCAR) Belarusa yeni partiya Azərbaycan neftini göndərib. İyunun 25-26-da Gürcüstanın Supsa limanından Belarusa növbəti partiya Azərbaycan nefti yola salınıb. Göndərilən Azərbaycan neftinin həcmi 85-90 min ton təşkil edib.
Xatırladaq ki, 2020-ci ildə SOCAR Belarusun “Belneftexim” konserni üçün 1 mln. tona qədər neft nəql etməyi planlaşdırır.
