Azərbaycan ÜST-ün Milli Laboratoriyalar şəbəkəsinə üzv oldu
Səhiyyə Nazirliyi Analitik Ekspertiza Mərkəzi (AEM) daim Ümumdünya Səhiyyə Təşkilatı (ÜST) ilə tibbin bütün sahələrində sıx əməkdaşlığını davam etdirir.
Rakus.az xəbər verir ki, tibb sahəsində müasir inkişaf tendensiyalardan xəbərdar olmaq və yenilikləri Mərkəzin fəaliyyətində tətbiq etmək AEM rəhbərliyinin və mütəxəssislərin əsas məqsədlərindən biridir.
AEM-in respublikamız adına daha bir uğurlu addımı ÜST-ün Bioloji preparatlar üzrə Milli Nəzarət Laboratoriyaları Şəbəkəsinə (WHO-National Control Laboratory (NCL) Network for Biologicals) üzv olmasıdır.
Qeyd edək ki, Bioloji preparatlar üzrə Milli Nəzarət Laboratoriyaları Şəbəkəsi 2016-cı ildə ÜST-ün təşəbbüsü ilə Hollandiyada baş tutmuş növbəti müşavirəsində ÜST tərəfindən prekvalifikasiya edilmiş peyvəndlərin sınağından məsul 21 milli peyvənd nəzarəti laboratoriyasının nümayəndələri tərəfindən yaradılıb. ÜST-ün bu qurumu ilə əməkdaşlıq AEM-in Keyfiyyətin yoxlanılması Laboratoriyası üçün geniş təcrübə mübadiləsi imkanı verəcək.
