“Azertrans Ltd” MMC şikayətə cavab verdi – REAKSİYA
Saytımızda dərc olunan “QALMAQAL: Xadimə təcavüz olunduğunu deyir, direktor isə susur” başlıqlı yazıda Qaradag rayonu, Səngəçal qəsəbə sakini, “AZERTRANS LTD” Məhdud Məsuliyyətli Cəmiyyətdə xadimə işləmiş Əhmədova Lalə Əlican qızı həmin müəssisənin direktoru Dasin Əfəndiyev tərəfindən zorlandığını və qanunsuz yolla işdən çıxarıldığını iddia edirdi. Şikayəti dərc etməmişdən əvvəl qarşı tərəfin də fikrini öyrənməyə çox çalışsaq da istəyimiz nail olmadıq. Çünki münasibət bildiriləcəyini desələr də günlərlə susmağa üstünlük verildi.
Bu gün isə redaksiyamızın elektron ünvanına qeyd olunan qurumun mətbuat xidmətindən açıqlama daxil oldu. İndi isə qarşı tərəfində fikri ilə tanış ola bilərsiniz.
Son günlər “Azertrans Ltd” MMC-nin sabiq əməkdaşı Əhmədova Lalə Əlican qızı bir sıra yerli xəbər saytları və sosial şəbəkələr vasitəsilə “əsassız şəkildə işdən çıxarılması” barədə qərəzli və böhtan xarakterli məlumatlar yaymaqdadır.
Bununla əlaqədar olaraq bildiririk ki, 21.05.2007-ci ildə “Azertrans Ltd” MMC-nin Səngəçal neft terminalına xadimə vəzifəsinə qəbul edilmiş Əhmədova Lalə Əlican qızı əmək funksiyasını yerinə yetirmədiyinə, əmək vəzifələrini kobud surətdə pozduğuna və iş yoldaşları ilə yola getmədiyinə görə 04.09.2018-ci il tarixində Həmkarlar İttifaqı Komitəsinin iclasında qəbul olunan qərara əsasən Azərbaycan Respublikası Əmək Məcəlləsinə uyğun olaraq 10.09.2018-ci il tarixində işdən azad edilmişdir.
İşlədiyi müddət ərzində L.Ə.Əhmədova özünü intizamsız əməkdaş kimi tanıtmışdır. Belə ki, L.Ə.Əhmədova Səngəçal terminalında xadimə işlədiyi müddətdə ona aid olan əmək funksiyalarını, işini lazımınca yerinə yetirmədiyinə, qeyri-etik ifadələr işlətdiyinə görə, iş vaxtı başa çatmamış iş yerini tərk etdiyinə görə, səbəb olmadan işə çıxmadığına görə, işini vaxtında görmədiyinə və iş yoldaşlarını təhqir etdiyinə görə dəfələrlə izahatı alınmış və intizam tənbehləri, o cümlədən 3 dəfə xəbərdarlıq, 3 dəfə töhmət və 1 dəfə şiddətli töhmət verilmişdir.
L.Ə.Əhmədova əmək hüquqlarının pozulması barədə 2018-ci ilin sentyabr ayında Azərbaycan Respublikası Prezidentinə və Əmək və Əhalinin Sosial Müdafiəsi Nazirliyinə yanında Dövlət Əmək Müfəttişliyinə müraciət etmişdir. Bununla əlaqədar müvafiq sənədlər Dövlət Əmək Müfəttişliyi tərəfindən araşdırılmış və məsələ ilə əlaqədar Dövlət Əmək Müfəttişliyindən “Azertrans LTD” MMC-yə qarşı heç bir irad bildirilməmişdir.
Göründüyü kimi, Əhmədova Lalə Əlican qızı tərəfindən yayılan məlumatlar tam əsassızdır və həqiqəti əks etdirmir. O, öz məsuliyyətsizliyinin və özbaşınalığının nəticəsi olaraq şirkətimizdən xaric edilib.
Həmçinin onu da bəyan edirik ki, bu kimi məsələlər şirkətin işgüzar nüfuzuna, eyni zamanda “Azertrans Ltd” MMC-nin Sanqaçal terminalında çalışan əməkdaşların şərəfinə, ləyaqətinə birbaşa təsir etdiyindən gələcəkdə şirkətin fəaliyyəti haqqında qərəzli və yoxlanılmamış məlumatlar dərc edildikdə, təşkilatımızın işgüzar nüfuzunu qorumaq məqsədilə məsələnin hüquqi müstəvidə həll edilməsi istiqamətində qanunvericiliyə uyğun olaraq tədbirlər görüləcəkdir.
