Bakıda elmi-praktik konfrans keçirilir - FOTO
Bu gün Bakıda Azərbaycan Tibb Universitetinin (ATU) təşkilatçılığı ilə “Allerqologiya və kliniki immunologiyanın müasir aspektləri” mövzusunda elmi-praktik konfrans keçirilir.
Rakus.az xəbər verir ki, konfransda çıxış edən ATU-nun tədris və müalicə işləri üzrə prorektoru, professor Sabir Əliyev, universitetin elmi işlər üzrə prorektoru, dosent Rauf Bəylərov, Azərbaycan Allerqoloq, İmmunoloq və İmmunoreabilitoloqlar Elmi Cəmiyyətinin prezidenti, ATU-nun II uşaq kafedrasının professoru Amaliya Əyyubova və Tibb Universitetinin Allerqologiya və immunologiya kafedrasının müdiri, professor Lalə Allahverdiyeva allerqologiya və immunologiyanın təbabətin ən aktual sahəsi olduğunu bildiriblər. “Allerqologiya və kliniki immunologiyanın müasir aspektləri” mövzusu haqqında iştirakçılara ətraflı məlumat verilib və konfransın elmi biliklərin mübadiləsində mühüm rol oynayacağı vurğulanıb.
Konfrans plenar iclaslarla işini davam edib. Mövzular ətrafında müzakirələr aparılıb və həkimlərin sualları cavablandırılıb. İştirakçılar ölkəmizdə tibb sahəsinin ən aktual mövzularından olan allergiya haqqında keçirilən konfransın yekunlarının xəstəliklərin daha dərindən öyrənilməsi üçün çox faydalı olduğunu qeyd ediblər.
