Bakıda şəhid jurnalist Məhərrəm İbrahimovun adına sinif otağı açılıb
Bakının Binəqədi rayonu şəhid Namiq Fərəczadə adına 100 nömrəli tam orta məktəbin sinif otaqlarından birinə şəhid jurnalist Məhərrəm İbrahimovun adı verilib.
Əvvəlcə Azərbaycanın suverenliyi və ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad olunub, ardınca Azərbaycanın Dövlət Himni səsləndirilib.
Məktəbin rus bölməsinin ibtidai sinif rəhbəri İnqa Tolmaçova bildirib ki, M.İbrahimov burda təhsil alıb və oxuduğu müddətdə ən nümunəvi şagirdlərdən biri olub. O söyləyib ki, Məhərrəm hər zaman məktəbin tədbirlərində fəal iştirak edib: “Məhərrəm hələ uşaq yaşlarından vətənpərvərliyi ilə seçilirdi. Jurnalist kimi fəaliyyət göstərdiyi dövrdə də vətənpərvərliyini sübut edib. O, ömrünün sonuna qədər Vətəninə, millətinə bağlı olub”.
Orta məktəb direktorunun müavini Kəmalə Hacıyeva deyib ki, bu sinif otağının yaradılmasına şəhid jurnalistin doğum günü ilə əlaqədar təhsil ocağının rəhbərliyi tərəfindən təşəbbüs göstərilib.
Onun sözlərinə görə, şəhid məzununun xatirəsini daimi əziz tutur və Məhərrəmin adını əbədiləşdirmək üçün sinif otaqlarından birinə onun adını vermək qərarına gəlib: “Məqsədimiz milyonların ürəyində özünə tac quran Məhərrəm İbrahimovun xatirəsini əbədiləşdirməkdir”.
Şəhidin ailəsi adından M.İbrahimovun bacısı Sevda Əsgərova çıxış edib. O bildirib ki, aprelin 16-da şəhid qardaşının 41 yaşı tamam olub: “İki ildir ki, doğum gününü onsuz qeyd edirik. Bütün Şəhidlər kimi, onun da ömür yolu, peşə fəaliyyəti gənclər üçün dəyərli nümunədir”.
O, göstərdikləri diqqət və qayğıya görə məktəbin rəhbərliyinə təşəkkürünü bildirib.
Məktəbin müəllimləri belə tədbirlərin əhəmiyyətini vurğulayaraq, yeni nəslin vətənpərvərlik ruhunda böyüməsi üçün bir nümunədir: “Torpaq, millət yolunda canlarından keçən mərd mübarizlərin əziz xatirəsi hər zaman qəlblərdə əbədi yaşayacaq”.
M.İbrahimovun həyat və fəaliyyəti ilə bağlı videoçarx nümayiş olunub, şagirdlər şəhid jurnalistə həsr olunmuş şeirlər söyləyiblər, kompozisiya nümayiş olunub.
Xatırladaq ki, işğaldan azad olunmuş ərazilərin, Ermənistan silahlı qüvvələri tərəfindən dağıdılmış yaşayış məntəqələrinin çəkilişini həyata keçirən jurnalistləri aparan nəqliyyat vasitəsi 2021-ci il iyunun 4-də Kəlbəcər rayonunun Susuzluq kəndi ərazisində tank əleyhinə minaya düşüb.
Nəticədə Azərtac İnformasiya Agentliyinin əməkdaşı 1982-ci il təvəllüdlü Məhərrəm İbrahimov (Əlioğlu), Azərbaycan Televiziyasının operatoru 1989-cu il təvəllüdlü Sirac Abışov və Kəlbəcər Rayon İcra Hakimiyyəti başçısının Susuzluq kənd inzibati dairəsi üzrə nümayəndəsinin müavini Əliyev Arif Ağalar oğlu xidməti vəzifələrini yerinə yetirərkən həlak olub, dörd nəfər yaralanıb.
Prezident İlham Əliyev iyunun 14-də işğaldan azad olunan ərazilərdə vəzifə borcunu yerinə yetirmiş Abışov Sirac Abış oğlu, Əliyev Arif Ağalar oğlu və İbrahimov Məhərrəm Əli oğlunu “3-cü dərəcəli “Vətənə xidmətə görə” ordeni ilə təltif edib.
Fotolar “Report”a məxsusdur.
