Baş həkimi İTTİHAM edirlər - VİDEO
Bərdə rayon sakini Hadıyev Natiq anası Nəzakət Hacıyevanın Respublika Neyrocərrahiyyə Xəstəxanasında səhv əməliyyat olunduğunu iddia edir.
Natiq Hacıyevin sözlərinə görə, həkimlər əvvəl anasının sağalacağını desələr də, əməliyyatdan sonra vəziyyətinin pisləşdiyini bildirərək evə aparmalarını istəyiblər.
Xəstənin qohumları bildirir ki, əməliyyat üçün onlardan böyük məbləğdə pul istəyiblər.
Bundan başqa, baş həkim Kabus Dadaşov onun yaxınlarına xəstənin reanimasiyada saxlanıldığını, buna görə yanına heç kimin buraxılmadığını deyib.
Respublika Neyrocərrahiyyə Xəstəxanasının baş həkimi Kabus Dadaşov bildirib ki, pasiyent xəstəxanaya gətirilən zaman vəziyyəti olduqca ağır olub:
“Xəstə arxa kəllə çuxurunun həcmli törəməsi ilə bizə müraciət edib. Ağır şiş xəstəliyidir. 5 aya yaxın müddətdir ki, bizim xəstəxanada müalicə olunur. Biz xəstəni əməliyyat etməzdən öncə ailə yaxınlarına mövcud vəziyyətlə bağlı məlumat vermişik. Əməliyyatın riskli olduğunu da bildirmişik.
Onlar bütün bunlara rəğmən əməliyyatın gerçəkləşməsinə razılıq verdiklərinə dair sənəd imzalayıblar. İlk əməliyyat normal keçib. Sadəcə olaraq xəstənin vəziyyəti stabil qalmayıb. Şişlərin yenidən əmələ gəlmə ehtimalı da var. Əməliyyatdan sonra xəstənin başına su yığılmışdı.
Bu xəstəliklərdə əməliyyatdan sonra bənzər hallar rast gəlinəndir. Ailəsinin razılığı ilə ötən il yenidən əməliyyat edərək onu vəziyyətdən çıxarmışıq. Sadəcə olaraq xəstənin vəziyyəti hələ də ağır olaraq qalır, həyati təhlükəsi davam edir”.
Ailə yaxınlarının xəstəni görə bilmədiklərinə dair iddialarına münasibət bildirən həkim, bunun əsassız olduğunu bildirib:
“Xəstə reanimasiyada saxlanılır. Əslində reanimasiyadakı xəstənin yanına heç kim buraxılmamalıdır. Lakin biz hər gün yalnız bir nəfər ən yaxın adamın bir neçə dəqiqəlik xəstə yanına girməsinə icazə veririk.
Ümumiyyətlə ailə yaxınları xəstənin yanına tez-tez gəlmir. Bir oğlu gəlirdi. Onlar reanimasiya şöbəsində tibb bacısına deyib, bir neçə dəqiqəlik xəstəni görə bilirlər. Biz ailə yaxınlarını xəstənin yanına niyə buraxmayaq ki?”
Qarşı tərəf iddia edir ki, həkim hər gün 200 manat civarında dərman müalicəsi yazır. Buna cavab olaraq həkim qeyd edib ki, xəstənin vəziyyətinə uyğun müalicə aparılır:
“Xəstənin vəziyyəti kritikdir. Müalicə, dərmanlar və doz vəziyyətə uyğun olaraq təyin edilir. Biz bu dərmanları təyin edirik. Amma ailə yaxınlarının dərmanları alıb-almamaq kimi azad hüququ var.
Ailə yaxınlarına da demişik, əlimizdə olan dərmanlarla müalicəni davam etdiririk. Lakin ümidimiz günbəgün azalır. Xəstənin müalicəyə cavab verməsi əvvəlki dövrlərə nisbətən zəifləyib”. (Oxu.Az)
