BMT uşaqları qızılca və poliomielitə qarşı peyvənd etməyə çağırdı
Birləşmiş Millətlər Təşkilatının Uşaq Fondunda (UNICEF) və Ümumdünya Səhiyyə Təşkilatında (ÜST) hesab edirlər ki, koronavirus pandemiyası uşaqların peyvənd olunmasına mane olmamalıdır.
Rakus.az xəbər verir ki, qurum poliomielit və qızılca epidemiyasının qarşısını almaqdan ötrü bu sahədə mümkün olan bütün zəruri tədbirləri görməyə səsləyib.
Səhiyyə sisteminin resursları indi əsasən COVID-19 pandemiyasına qarşı mübarizəyə yönəldiyindən bir çox ölkələrdə vaksinasiya kampaniyasına gecikmələr müşahidə olunur.
ÜST və UNICEF-də aparılan hesablamalara görə, peyvənd və immunizasiya üzrə Qlobal Alyansdan (GAVİ) dəstək almayan ölkələrdə bu istiqamətdəki bütün boşluqları doldurmaq üçün 655 milyon dollar tələb olunur.
“COVID-19 pandemiyasının nəticələri səhiyyə sahəsinə, xüsusən də qlobal miqyaslı immunizasiya prosesinə son dərəcə mənfi təsir göstərir. Bununla belə, COVID-19 pandemiyası ilə bağlı yaranmış vəziyyətdən fərqli olaraq, bizdə poliomielit və qızılca ilə mübarizə aparmaq üçün bütün lazımi bilik və vasitələr var”, – ÜST-nin rəhbəri Tedros Qebreyesus söyləyib.
“Biz bu sahədə qazandığımız bütün bilik və bacarığımızı, müvafiq əyani vasitələri tətbiq etməkdən ötrü kifayət qədər iradəyə və resurslara malikik. Əgər biz buna nail olsaq, bir çox uşağın həyatını xilas edə bilərik”, – o əlavə edib.
Son bir neçə ildə qızılca xəstəliyinin qlobal miqyasda sürətlə yayılması müşahidə olunur. Mütəxəssislər əsas səbəblərdən biri kimi əhalinin peyvəndlərdən imtina etməsini göstərirlər. 2019-cu ildə bu xəstəliyə yeni yoluxmaların sayı son 20 il ərzində qeydə alınmış ən yüksək həddə çatıb. COVID-19 pandemiyası bu sahədəki mövcud vəziyyəti daha da gərginləşdirib.
Bununla yanaşı, Pakistan və Əfqanıstanda, habelə Afrikanın bəzi regionlarında poliomielit xəstəliyinə tutulanların sayının artacağı ehtimal olunur. ÜST xəbərdarlıq edir ki, xəstəliyin yayılması indi dayandırılmasa, yaxın 10 il ərzində yeni yoluxanların sayı ildə 200 minə çata bilər.
“COVID-19 qlobal pandemiyasına qarşı mübarizə çox vacibdir. Lakin dünyanın ən yoxsul bölgələrində milyonlarla uşağın həyatını riskə məruz qoyan digər çox təhlükəli xəstəliklər var. Biz bütün ölkələrin rəhbərlərini, donorları və tərəfdarları bu istiqamətdə birgə əməkdaşlığa dəvət edirik. Bununla belə, yenidən vaksinasiya kampaniyasını başlamaq üçün bizim hələ də əlavə maliyyə resurslarına ehtiyacımız var”, – doktor Tedros vurğulayıb.
