Bunları bilirsinizmi?
Bakirəliyin bərpası (himenoplastika) bütün cəmiyyətlər üçün ən aktual məsələlərdən hesab edilir.
Rakus.az xəbər verir ki, əgər hesab edirsinizsə ki, bu, yalnız müsəlman ölkələrində, şərqdə aktualdır, yanılırsınız. Araşdırma zamanı məlum olub ki, qərbin ən inkişaf etmiş ölkələrində belə bakirəliyin bərpası ilə bağlı xeyli müraciət olur. Qadınlar dini, etik, əxlaqi və psixoloji səbəblərdən bakirəliklərini bərpa etdirirlər. Keçmiş SSRİ şəhərləri arasında isə bakirəliyin uzun müddətli bərpası ilə məşğul olan ən məşhur həkimlər Sankt-Peterburqda fəaliyyət göstərirlər.
Əməliyyat metodları
Əvvəlcə onu deyək ki, bakirəlik iki cür bərpa olunur:
1. Qısa müddət üçün
2. Uzun müddət üçün
Müraciətdə bakirəliyin yaxın 7-10 gün ərzində bərpasını tələb edilirsə, qısa müddət üçün nəzərdə tutulan metoddan istifadə olunur. Bu zaman, sadəcə, pozulmuş bakirəlik pərdəsinin kənarlarını birləşdirib tikirlər. Pərdə olduqca incə olduğundan, oraya atılan tikişlər tutmaya bilər. Bu zaman həkimlər vaginal divardan alınan kiçik hissələr hesabına onu cinsi əlaqə zamanı qanaya biləcək formaya salırlar. Ümumiyyətlə, himenoplastikanın əsas məqsədi əlaqə zamanı vaginada qanamanı təmin etməkdir. Yəni bu, tibbi cəhətdən mümkündür. Bu əməliyyat yerli və ümumi keyitmə ilə də aparıla bilər.
Həkimlər bildirir ki, nikah öncəsi qızlıq pərdəsinin bərpası üçün ən uyğun vaxt, əlaqədən 2-3 gün öncə hesab olunur. Çünki tikilən pərdə yalnız 2-3 gün ərzində orqanizmə uyğunlaşır və əlaqə zamanı qanayacaq hala gəlir. Bir müddət sonra isə effektini itirir. Uzun müddətli himenoplastikada isə müalicə uzun müddət aparılır, vaginanın giriş toxuması hesabına pərdənin bütövlüyünün bərpası nəzərdə tutulur. Bu, bir qədər çətin əməliyyatdır və ümumi narkozdan istifadə edilir. Əməliyyat nəticəsində bakirəlik pərdəsini bərpa etmək mümkün olur. Lakin əməliyyatın nəticəsini görmək üçün 1 aydan 3 aya kimi gözləmək lazımdır. Hər orqanizmdə müxtəlif müddətdə bərpa gedə bilər.
Göstərişlər və əks göstərişlər
Himenoplastikanın yeganə göstərişi yalnız pasiyentin arzusudur. Əks göstərişlər isə qan laxtalanması, ruhi və müxtəlif orqanların ümumi ciddi xəstəlikləri ola bilər. Bütün hallarda əməliyyatdan əvvəl pasiyent ciddi müayinə edilməlidir.
HİV, sifilis, hepatit B və C üçün qan testləri və vaginadan yaxma götürülür. Eyni zamanda pasiyentin ürəyi də müayinə olunur. Ümumi narkozun hər hansı fəsad yaratmaması üçün əlavə yoxlamalar da təyin edilə bilər.
Əməliyyatın xüsusiyyətləri
Himenoplastika növbəti menstruasiyaya 4-5 gün qalmış həyata keçirilir. Ən ideal vaxt isə iki menstruasiyanın ortasıdır. Həkimlərin sözlərinə görə, bu müddət gec olmamalıdır, yoxsa heç bir nəticə əldə edilməz. Əməliyyatdan sonra isə mütləq 3 saata kimi klinikada müşahidə altında qalmaq lazımdır.
Psixoloji səbəblər
Həkimlər bildirir ki, bəzi qadınlar, ailə quracağı kişidən və ya yeni sevgilisindən cinsi təcrübələrini gizlətməyə çalışırlar. Bəziləri isə partnyoruna, sadəcə, yeni duyğular yaşatmaq istəyir, intim həyatlarına bir az müxtəliflik, fantaziya qatmaq arzusundadırlar.
Bildirildiyinə görə, bəzi qadınlarda isə psixoloji durum elə vəziyyətdə olur ki, keçmiş intim həyatları ilə gələcək arasında görünməz xətt çəkmək üçün bunu edirlər. Hətta qadınlar var ki, həkimlə söhbətlərində bildiriblər ki, psixoloji problemlərini bu yolla daha rahat həll etdiklərini düşünürlər. Onların açıqlamasına görə, bu əməliyyat uzun-uzun psixoloq yanına getməkdən daha effektlidir.
Araşdırmalar nəticəsində o məlum oldu ki, himenoplastikaya müraciət edənlər arasında zəngin ərəb qadınları üstünlük təşkil edirlər. Onlar daha çox bakirəliyin uzun müddətli bərpasını istəyirlər.
