Bunları bilirsinizmi?

Sağlam həyat tərzi üçün gecə yuxusunun keyfiyyətli olması çox vacibdir.

Rakus.az xəbər verir ki, hazırda ən aktual mövzulardan biri budur: yataqda necə uzanıb yatmaq daha yaxşıdır? Yəni necə yataq ki, səhər özümüzü tamamilə qüvvətli və enerjili hiss edək? Norveç və Danimarka alimləri 2012-2014-cü illərdə bu məsələ ilə bağlı bəzi eksperimentlər keçiriblər.

Yuxu üçün ən optimal poza

Norveç Texnologiya Universiteti, Danimarka Milli Araşdırma Mərkəzi və Cənubi Danimarka Universiteti yanında Kliniki Biomexanika Departamentinin mütəxəssisləri birlikdə araşdırma aparıblar. 20-65 yaş arası 1119 nəfər arasında eksperiment keçirilib. Alimlər bu insanların bütün parametrlərini: çəki, yaş və fiziki vəziyyətinin nəzərə alaraq, 2 il müddətində yuxu vərdişlərini izləyiblər. Nəticədə məlum olub ki, yatarkən bədənin hansı vəziyyətdə olmasının fiziki sağlamlıqla birbaşa əlaqəsi var. Belə ki, böyrü üstə yatanlar, arxası və üzü üstə yatanlara nisbətən səhər yuxudan daha enerjili oyanırlar. Bu insanlar digərlərindən daha sağlamdırlar.

Eksperiment aparılan insanların 54,1 faizi böyrü üstə, 37,5 faizi arxası üstə, 8,4 faizi isə qarnı üstə yatıb. Bu nisbət isə heç də təsadüfi deyil, haradasa qanunauyğunluqdur. Gənc yaşlarda insanlar daha çox arxası üstə yatırlar, çünki bu dövrdə əsasən onurğa sütunu formalaşır. Yaş irəlilədikcə isə orqanizmin daha çox böyrü üstə yatmağa ehtiyacı olur ki, insanlar da buna üstünlük verir. Gecələr insanlar qeyri-iradi olaraq bir neçə dəfə yatış mövqeyini dəyişirlər ki, bununla da, əzələ toxumalarının durğunluğundan, əzilməsindən qaçmış olurlar. Onu da qeyd edək ki, qadınlar kişilərə nisbətən daha çox böyrü üstə yatırlar. Bu amil xanımları daha enerjili, fiziki cəhətdən sağlam və uzunömürlü edir.

Hansı böyrü üstə yatmaq doğrudur?

“Sağlam olmaq istəyirsənsə, sol böyrü üstə yat” – alimlər belə deyir. İnsanın həzm orqanları asimmetrikdir. Sol tərəfdə yatmaqla bağırsaqların işini stimullaşdırırıq. Belə vəziyyətdə həm də mədə mədəaltı vəzdən aşağıda olur. Bu isə mədə qıcqırması, qəbizlik, bağırsaqların qıcıqlanması sindromundan xilas olmağa kömək edir.

İkinci vacib hal isə qan dövranı və limfa axını ilə bağlıdır. Sol böyrü üstə yatan şəxslərin orqanizmində qan və limfa daha tez və sürətli yayılır. Eyni zamanda beyin yaxşı qidalanır ki, buna görə də insan yuxudan gümrah oyanır. Limfanın sərbəst hərəkət etməsi orqanizmdə istifadəsiz məhsulların, toksinlərin tez bir zamanda bədəndən çıxmasına kömək edir və artıq çəki ilə mübarizə aparır. Sözügedən pozada yatmaq xorultunu da azaldır. Bu isə beynin daha çox oksigen almasına kömək edir.

Kimlərə sol böyrü üstə yatmaq məsləhət deyil?

Lakin bu məsələdə bəzi istisnalar var. Ürək çatışmazlığı və infarkt keçirən insanlara sol tərəfində yatmaq olmaz. Bu pozada ürək yüksək təzyiq altında qalır və zəifləmiş orqan daha da zərər görür.

Qalan insanların hamısına isə sol böyrü üstə yatmaq məsləhət görülür. Alimlər deyirlər ki, hamilə qadınlar və artıq çəkili insanlar ayaqlarının arasına balaca döşəkcə qoyub yatsalar, onurğa sütununa düşən yükün, təzyiqin qarşısını almış olarlar. Onu da unutmayın ki, keyfiyyətli, rahat yataq da sağlamlıq üçün vacib şərtdir.