İlon Mask 100 milyon dollar mükafat vəd verdi
“Tesla Inc” şirkətinin rəhbəri, milyarder-sahibkar İlon Mask öz “Twitter” səhifəsində yazıb ki, karbon qazı tullantılarının tutulması üçün ən yaxşı texnologiya yaradan şəxsə 100 milyon dollar mükafat verəcək.
Rakus.az xəbər verir ki, Mask bundan əvvəl də dəfələrlə alimlərə müraciət edərək qlobal istiləşmə probleminin aradan qaldırılması üçün havadakı karbonun tutulması yolu ilə texnologiyalar tapmağa çağırıb.
Qlobal istiləşməyə səbəb olan tullantıların tutulması iqlim dəyişmələrinə nəzarət üzrə planların çoxunun mühüm tərkib hissəsidir, lakin indiyə qədər bu texnologiyada çox cüzi irəliləyiş olub və əsas səylər karbonun havadan kənarlaşdırılması üzərində deyil, tullantıların azaldılması üzərində cəmləşib. Beynəlxalq Energetika Agentliyi keçən ilin sonunda bəyan edib ki, tullantıların sıfıra endirilməsinə nail olmaq üçün karbonun tutulması texnologiyalarının tətbiq edilməsi zəruridir.
Maskı ilk dəfə məşhurlaşdıran onun internet ödənişlər üzrə “PayPal Holdings Inc.” şirkətini yaratması və onu satması olub. Hazırda o, “SpaceX” şirkətinin təsisçisi, sahiblərindən biri, Baş direktoru və baş mühəndisi, “Tesla” şirkətinin Baş direktoru və əsas ideya müəllifidir. Özünün yaxın qohumları tərəfindən təsis edilmiş “SolarCity” şirkəti “Tesla” ilə birləşənə qədər Mask “SolarCity”-nin direktorlar şurasının üzvü olmuş Mask indi “Tesla” şirkəti ilə yanaşı, insan beyninin kompüterlərə qoşulması üçün yüksək buraxıcılıq qabiliyyətinə malik olan “beyin-maşın” interfeyslərinin yaradılması ilə məşğul olan “Neuralink” şirkətinə rəhbərlik edir.
Onu da qeyd edək ki, ABŞ Prezidenti Co Bayden iqlim dəyişmələrinə qarşı mübarizə üzrə özünün geniş planı çərçivəsində karbonun tutulması texnologiyalarının işlənib hazırlanmasını sürətləndirəcəyini vəd edib.
