Latın Amerikasını iqtisadi fəlakət gözləyir – Dünya Bankı
Koronavirus Latın Amerikası və Karib hövzəsi ölkələrində iqtisadi artıma son zərbədir.
Rakus.az xəbər verir ki, bu bölgədə, xüsusilə Çilidə, hələ 2019-cu ilin sonunda yaranmış sosial gərginlik və əsas qida məhsullarının qiymətlərinin düşməsi nəticəsində iqtisadi artım xeyli zəifləyib.
Dünya Bankı tərəfindən bazar günü dərc edilmiş proqnozlara əsasən Latın Amerikası regionu 2020-ci ili ÜDM-in 4,6 faiz azalması ilə başa vuracaq. Amerikaarası İnkişaf Bankı ÜDM-in 1,8 faizdən 5,5 faizə qədər azalacağını proqnozlaşdırır. Bu, regionda ən böyük iqtisadi fəlakət deməkdir.
Regionun böyük ölkələri arasında ən çox zərər çəkən Meksika və Ekvador olacaq (bu ölkələrin hərəsində ÜDM-in 6 faiz azalacağı gözlənilir). Sonrakı yerləri Argentina (-5,2 faiz), Braziliya (-5 faiz), Peru (-4, 7 faiz), Çili (-3 faiz) və Kolumbiya (-2 faiz) tutur. Dominikan Respublikası və Qayana Latın Amerikası regionunda yeganə dövlətlərdir ki, onların iqtisadiyyatının tənəzzül məngənəsindən qaça biləcəyinə ümid var. Bu ümid həmin ölkələrdə bir neçə neft yatağının istismarı ilə bağlıdır.
2021-ci ilə Dünya Bankı 2,6 faiz artım gözləyir. Bu, 2013-cü ildən bəri ən yüksək göstəricidir. Dünya Bankına müvafiq məlumatlar təqdim etməyən Venesueladan başqa, regionun bütün ölkələri inkişafın müsbət vektoruna qayıda biləcəklər. Argentinada ÜDM-in 2,2 faiz artması proqnozlaşdırılır. Ancaq ən sürətli dirçəliş And dövlətlərində olacaq: Peruda iqtisadiyyat 6,6 faiz, Kolumbiyada 3,4 faiz, Ekvadorda isə 3,2 faiz artacaq.
Dünya Bankının proqnozları düz çıxsa, region ölkələri dünya iqtisadiyyatı üçün başıbəlalı 2020-ci ildə COVID-19-un fəsadlarını cəmi 12 ay ərzində azalda biləcək. İki Latın Amerikası dövlətində ÜDM tədricən artacaq: Meksikada 2,5 faiz, Braziliyada 1,5 faiz.
Dünya Bankı Latın Amerikası ölkələrinin hökumət başçılarını maliyyə böhranından yaxa qurtarmaq və cəmiyyətdə ən zəif əlaqələri qorumaq üçün onların sərəncamında olan bütün vasitələrdən istifadə etməyə çağırır.
