“Rahat” marketin rəhbərliyi sosial şəbəkələrdə supermarketlər şəbəkələrindən birinin qarşısında mağaza əməkdaşları tərəfindən bir pişiyin dəfələrlə döyülməsi ilə bağlı yayılan məlumatlara aydınlıq gətirib.
Rakus.az xəbər verir ki, sosial şəbəkələrdə yayılan “Rahat” marketin paytaxtın Nərimanov rayonu, Faiq Yusifov küçəsində yerləşən filialının qarşısında çəkilən görüntülərdə mağaza əməkdaşları tərəfindən bir pişiyin dəfələrlə azdırılması və döyülüb öldürülməsi ilə bağlı yayılan məlumatlar yanlışdır.
Yayılan məlumatlarda deyilir ki, pişik mağazaya buraxılmayıb və əməkdaşlar tərəfindən pişiyə təzyiq göstərilib:
“Həmin görüntülər tərəfimizdən araşdırılıb və iddiaların tamamilə əsassız olduğu sübut edilib. Təhlükəsizlik kameralarında olan görüntülərdə də hər şey açıq-aydın görünür. Pişik vəziyyəti pis halda anbarımıza yaxınlaşır və heç kim ona heç nə etmir. Pişiyin narahatlığını görən heyvansevər əməkdaşımız Rəsulova Aytac onu götürərək, paytaxtın Fətəli Xan Xoyski 184A ünvanında yerləşən xəstəxanaya aparır. Baytar pişiyi müayinə etdikdən sonra məlum olub ki, pişik hamilədir və doğum vaxtıdır. Pişiyin halsız olması bununla əlaqədardır.
Pişiyə sistem vurulub və lazimi tibbi yardım göstərilib. Lakin pişiyin həyatını qurtarmaq mümkün olmayıb. Həmçinin, əməkdaşımız pişiyə sistem köçürülən zaman onun görüntülərini də çəkib. Təqdim edilən foto və videogörüntülərdən də göründüyü kimi pişik əməkdaşımız tərəfindən həqiqətən də həkimə aparılır. Nəinki pişiyə şiddət olunduğu, əksinə qayğı göstərildiyi aydın görünür.
Daha sonra ölən pişiyi baytar həkimdən məcbur alan şəxs onu müxtəlif variantlarda çəkərək, sosial şəbəkələrdə həqiqətə uyğun olmayan başlıq altında ictimailəşdirib. Bildirmək istəyirik ki, həmin şəxsin iddiaları tamamilə yalandır və həqiqətləri əks etdirmir”.
Məlumatda o da qeyd olunub ki, “Rahat” market şəbəkələri müştəri məmnuniyyəti ilə yanaşı, digər canlılara da mümkün qədər diqqət və qayğı ilə yanaşır. “Rahat” marketin səhifələrində izləyicilərimiz dəfələrlə heyvanlara və digər canlı dostlarımıza qarşı olan sevgi və qayğımızı görə bilərlər.
