“Mart hadisələri erməni cinayətinin ən dəhşətlisidir” – ekspert
“Müsəlman-türk xalqları tarixin bütün dövrlərində xəyanətin və hiyləgərliyin acısını yaşayıblar. Erməni cəlladları tərəfindən 1918-ci il martın sonlarından aprelin ilk günlərinə qədər Azərbaycan xalqına qarşı törədilən soyqırımı aktı da bu acılardan biridir. Əslində ermənilər mart hadisələrinə qədər də müsəlman-türklərə qarşı ağır cinayətlər törətmişdilər. Mart hadisələri bu cinayətlərin ən dəhşətlisi oldu”.
Rakus.az xəbər verir ki, bu fikirləri AZƏRTAC-a açıqlamasında sosial elmlər üzrə ekspert, türkiyəli yazıçı Mətin Yıldırım ifadə edib.
Məlum hadisələrin böyük güclərin təhriki və dəstəyi ilə törədildiyini diqqətə çatdıran ekspert deyib: “1918-ci ilin mart hadisələrinin başlıca məqsədi müstəqil Azərbaycan dövlətinin qurulmasının qarşısını almaq idi. Ermənilər şirniklənmişdilər ki, bölgədəki müsəlman əhalini qırmaqla özlərinə dövlət yaratmaq üçün torpaq əldə edəcəklər. Onların 1918-ci ildə Azərbaycanda törətdikləri qırğınlar Osmanlı dövləti ərazisindəki cinayətlərinin təkrarı idi. Əgər Qafqaz İslam Ordusu və Azərbaycan Xalq Cümhuriyyəti birgə hərəkət edib erməni vandalizminin qarşısını almasaydılar soyqırımı hadisələri yenə də davam edəcəkdi”.
Ulu öndər Heydər Əliyev 1998-ci il martın 26-da imzaladığı Fərmanla 31 Mart – Azərbaycanlıların Soyqırımı Günü elan edilməsini tarixi ədalətin bərpası kimi dəyərləndirən Mətin Yıldırım əminliklə vurğulayıb ki, son illər bu sahədə görülən işlər Xocalı soyqırımı daxil olmaqla ermənilərin XX əsr boyunca Azərbaycan və Türkiyədə törətdikləri bəşəri cinayətlərin dünya ictimaiyyətinə çatdırılmasına geniş imkanlar yaradıb.
