“Oş – Türk dünyasının mədəniyyət paytaxtı”nın açılışı oldu - FOTO
Qırğızıstanda “Oş – Türk dünyasının mədəniyyət paytaxtı” layihəsinin rəsmi açılış mərasimi keçirilib.
Rakus.az xəbər verir ki, aprelin 20-də baş tutan mərasimdə Qırğızıstan Prezidenti Sooronbay Jeenbekov, hökumətin və Joqorku Keneşin (parlament) üzvləri, TÜRKSOY-un Baş katibi Düsen Kaseinov, UNESCO və İSESCO-nun yüksək səviyyəli təmsilçiləri, Azərbaycan, Türkiyə, Qazaxıstan, Özbəkistan, Türkmənistandan nümayəndə heyətləri, elm, mədəniyyət və incəsənət xadimləri iştirak ediblər.
Azərbaycanı tədbirdə mədəniyyət nazirinin müavini Rafiq Bayramovun rəhbərliyi ilə nümayəndə heyəti təmsil edib.
Qırğızıstan Prezidenti Sooronbay Jeenbekov mərasimdə çıxış edərək ölkəsində yaşayan xalqları təbrik edib, qədim Oş şəhərinin “Türk dünyasının mədəniyyət paytaxtı” elan olunmasından qürur duyduğunu bildirib. Prezident bu qədim şəhərin tarixi abidələri və tanınmış şəxsiyyətləri haqqında danışıb.
Dövlət başçısı deyib ki, bu bayrama Azərbaycan, Türkiyə, Qazaxıstan, Özbəkistan, Türkmənistan, Rusiya, Serbiya, Bosniya və Herseqovina, Makedoniya və digər ölkələrdən incəsənət ustaları qatılıblar.
Sonra çıxış edən TÜRKSOY-un Baş katibi Düsen Kaseinov bildirib ki, Oş şəhərinin üç min ildən artıq yaşı var və Böyük İpək Yolu üzərində yerləşdiyindən onun zəngin mədəniyyəti və ənənələri formalaşıb.
Sonra TÜRKSOY-un üzvü olan və digər ölkələrin incəsənət ustalarının iştirakı ilə böyük konsert proqramı təqdim olunub. Həmçinin “Oş – Türk dünyasının mədəniyyət paytaxtı” layihəsi çərçivəsində Oş Vilayət Dram Teatrında “Qorqud Ata” tamaşası nümayiş etdirilib.
Tamaşadan əvvəl çıxış edən TÜRKSOY-un Baş katibi Düsen Kaseinov 3 min il tarixi olan Oş şəhərinin “Türk dünyasının mədəniyyət paytaxtı” elan olunmasını əhəmiyyətli hadisə adlandırıb. O deyib ki, qədim Oş şəhəri dünyada tanınan nadir abidələri, tarixi şəxsiyyətləri ilə məşhurdur.
D.Kaseinov bildirib ki, Dədə Qorqud, Qorqud Ata türkdilli xalqların əfsanələrində, nağıllarında və xalq hekayələrində adı çəkilən ozandır. Qeyd edib ki, bu tamaşa Türkiyədə və Qazaxıstanda teatr festivallarında nümayiş etdirilib və mükafatlar qazanıb.
Sonra tamaşanın nümayişi olub.
Səhnə əsərinin ssenarisinin müəllifi Kayrat İmanaliev, rejissoru isə Marat Kozukeevdir.
