“Türkiyədə Qərbi Azərbaycan məsələsinə ikili münasibət var” - VİDEO

Bu gün Qərbi Azərbaycan Xronikası layihəsi çərçivəsində növbəti veriliş efirə gedib.

Rakus.az xəbər verir ki, jurnalist Rufik İsmayılovun müsahibi Milli Məclisin Elm və təhsil komitəsinin sədr müavini, ADA Universitetinin prorektoru Fariz İsmayılzadə olub. O, soydaşlarımızın problemlərinə dünya ictimaiyyətinin diqqətini cəlb etmək üçün ölkəmizin hüdudlarından kənarda Qərbi Azərbaycan mövzusunda keçirilən tədbirlərin xüsusi əhəmiyyət daşıdığını söyləyib. Bildirib ki, bu cür fəaliyyətlərlə Azərbaycan xalqına qarşı zaman-zaman ermənilər tərəfindən törədilmiş soyqırımı və deportasiyalar konkret faktlarla, elmi əsaslarla geniş auditoriyaya çatdırılır.

Millət vəkilinin sözlərinə görə, Qərbi Azərbaycan İcması təmsilçilərinin iştirakı ilə indiyə kimi bir neçə xarici ölkədə bu istiqamətdə tədbirlər baş tutsa da ötən ay Türkiyənin paytaxtı Ankarada keçirilən beynəlxalq konfrans iştirakçı sayına və gündəlikdəki mövzuya görə tamamilə fərqlənib. Belə ki, Türkiyədən 250-ə yaxın iştirakçının, o cümlədən Türkiyə Böyük Millət Məclisi (TBMM) üzvlərinin, dövlət qurumları nümayəndələrinin, universitet rektorlarının, elm və iş adamlarının, qeyri-hökumət təşkilatlarının və media mənsublarının qatıldığı konfransda “Qərbi Azərbaycana qayıdış insan hüquqlarının aliliyinin mühüm şərti kimi” mövzusunda geniş müzakirələr aparılıb. Beynəlxalq konfransda Qərbi Azərbaycan həqiqətləri və Qərbi Azərbaycan İcmasının fəaliyyəti, Qərbi azərbaycanlıların ləyaqətli şəkildə geri qayıdışı ilə bağlı film nümayiş etdirilib, Azərbaycan Respublikası Prezidenti Administrasiyasının şöbə müdiri Ədalət Vəliyev tərəfindən Prezident İlham Əliyevin tədbir iştirakçılarına müraciəti oxunub.

Deputat F.İsmayılzadə Ankara konfransına xarici ölkələrdən tarixçi-alimlərin də dəvət olunduğunu xatırladıb. Qeyd edib ki, Türkiyədə Qərbi Azərbaycan məsələsinə ikili münasibət var. Millət vəkili Qərbi Azərbaycana sülh yolu ilə qayıdışın, Zəngəzur dəhlizinin açılmasının Azərbaycanın xarici siyasətində prioritet hədəflər olduğunu dilə gətirib. Deyib ki, soydaşlarımızın ata-baba yurduna dinc və ləyaqətli şəkildə qayıtması, Zəngəzur dəhlizinin açılması Türk dövlətlərinin birləşməsi ilə nəticələnəcək. F.İsmayılzadə ADA Universitetində Qərbi Azərbaycana aid tədbirlərin keçirildiyini, tələbə-gənclərin bu mövzuda təşkil olunan görüşlərdə fəal iştirak etdiyini də diqqətə çatdırıb.

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulması, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Veriliş mayın 31-də saat 20:30-da Baku Tv-nin efirində və saat 21:30-da Youtube kanalında yayımlanıb.