Ukraynada ikinci tura start verildi
Ukraynada prezident seçkilərinin ikinci turu ilə bağlı aprelin 8-dən namizədlərin təbliğat-təşviqat kampaniyasına başlanıla bilər.
Rakus.az xəbər verir ki, bu barədə keçirdiyi mətbuat konfransında Ukrayna Mərkəzi Seçki Komissiyasının sədri Tatyana Slipaçuk məlumat verib.
Onun sözlərinə görə, seçki qanunvericiliyinə əsasən aprelin 8-dən namizədlərin seçki kampaniyasına başlanılacaq. Seçki qanunvericiliyinin tələbələrinə uyğun olaraq, seçki öncəsi kampaniyanın bütün növlərindən istifadə etmək olar.
Ümumiyyətlə, bu gün Ukrayna Mərkəzi Seçki Komissiyası prezident seçkilərinin birinci turu ilə bağlı səsverməyə dair rəsmi nəticələri açıqlayıb. Rəsmi nəticəyə əsasən, prezidentliyə namizədlər Vladimir Zelenski seçicilərin 30,24 faizinin (5 713 825 nəfər), Petro Poroşenko isə 15,95 faizinin (3 014 523 nəfər) səsini toplayıb.
Martın 31-də 39 namizədin iştirak etdiyi prezident seçkilərində seçici fəallığı 63,48 faiz olub. Namizədlərdən heç biri 50 faiz səs toplamadığı üçün aprelin 21-də prezident seçkilərinin ikinci turu keçiriləcək. Hər iki namizəd Kiyevin mərkəzi “Olimpiya” stadionunda debatın keçirilməsinə razılıq verib. Debatın keçirilmə vaxtı barədə hələlik qərar qəbul olunmayıb.
Bu arada Ukrayna Prezident Petro Poroşenko prezidentliyə digər namizəd Vladimir Zelenski ilə debatın aprelin 14-də Kiyevin mərkəzi “Olimpiya” stadionunda keçirilməsini istəyir.
Bunu P.Poroşenko “Ukrayna” telekanalına canlı müsahibəsində bəyan edib: “Aprelin 14-də Zelenskini onun arzusu ilə “Olimpiya” stadionunda gözləyirəm. Düşünürəm ki, debatın axşam 19:00 başlaması münasib vaxtdır. Mən bütün vətəndaşları, telekanalları, KİV nümayəndələrini debata dəvət edirəm”.
Xatırladaq ki, Ukraynada prezident seçkilərinin ikinci turu aprelin 21-də keçiriləcək.
