Vüqar Səfərli milyonlar mənimsəyib – RƏQƏMLƏR
Ləğv edilən Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) keçmiş direktoru Vüqar Səfərlinin mənimsədiyi vəsaitlərin həcmi bəlli olub.
Rakus.az xəbər verir ki, Baş Prokurorluğun Vüqar Səfərlinin həbsi ilə bağlı yaydığı məlumatda bu barədə rəqəmlər yer alıb.
İttihama görə, V.Səfərli 2015-2019-cu illər ərzində 300 min manat məbləğində olan hissəsini ailə üzvünün adına təsis etdiyi “Futbol+Qol” qəzetinə qanunsuz olaraq köçürüb.
Həmçinin həmin pulu, eləcə də qurumun məqsədlərinin həyata keçirilməsi üçün alınmış 103 min manat dəyərində dəftərxana ləvazimatlarını da mənimsəyib.
Bundan başqa V.Səfərli Yasamalda Mətbuat prospekti, 23L ünvanında yerləşən müəssisə binasının 3-cü mərtəbəsinin Fondun inzibati istifadəsinə verilməsi məqsədilə maddi baxımdan Fond üçün daha ağır şərtlərlə icarəyə götürülməsinə dair müqavilələr bağlayıb.
Bu məqsədlə o, 2011-2019-cu illər ərzində ümumilikdə 812 min manat məbləğində pul vəsaitini icarə haqqı adı ilə köçürməklə dövlət büdcəsinə külli miqdarda ziyan vurub.
Eyni zamanda 2017-2019-cu illər ərzində ziyafətlərin keçirilməsi ilə bağlı satınalma müqavilələrinin bağlanması zamanı qanunsuzluqlara yol verib.
KİVDF-yə məxsus olmaqla ona etibar edilmiş cəmi 105 min manat məbləğində pul vəsaitini israf edib.
Bundan əlavə, V. Səfərli kommersiya bankında olan milli və xarici valyutadakı depozit hesablarına 2015-2018-ci illər ərzində 5 milyon 796 min manatı yerləşdirməklə cinayət yolu ilə əldə edilmiş həmin pul vəsaitlərini külli miqdarda leqallaşdırıb.
Baş Prokurorluğun məlumatına nəzər salsaq, V.Səfərlinin jurnalistlər üçün tikilən binalardan da “xeyir” götürdüyü bildirilir.
