Bakıda 5 yeni xüsusi ekspres marşrut xətti açılır
Xüsusi karantin rejimin gücləndirilməsi işləri çərçivəsində metro stansiyaların fəaliyyətinin məhdudlaşdırılması ilə əlaqədar Bakı Nəqliyyat Agentliyi tərəfindən 5 əlavə xüsusi ekspres marşrut xətti təşkil edilir.
Rakus.az xəbər verir ki, agentlikdən verilən məlumata görə, ilk növbədə həyat fəaliyyətinin təmin edilməsi baxımından zəruri hesab olunan sahələrdə (xüsusi xidmət sahələri, ərzaq mağazaları və sair) xüsusi xəstəxana və karantin məntəqələrində çalışan vətəndaşların daşınmasını təmin etməkdir.
Təşkil edilən marşrutlar xəstəxanalar və karantin obyektlərini, eyni zamanda, digər zəruri əraziləri əlaqələndirəcək. Marşrutlar üzrə “BakuBus” MMC-nin istismarında olan avtobuslar cəlb ediləcək. M3, M4, M5, M6 və M7 ekspres xətti üzrə avtobuslar martın 30-dan xidmətə başlayacaq.
Ekspres xətt üzrə avtobuslar müəyyən edilmiş yerlərdə dayanacaq və sərnişin təlabatına uyğun interval ilə xidmət göstərəcək.
Təşkil olunacaq ekspres xətləri
1. M3 “Koroğlu” metro stansiyası – “28 May” metro stansiyası
2. M4 “20 Yanvar” metro stansiyası – S.Vurğun bağı
3. M5 “Koroğlu” metro stansiyası – “20 Yanvar” metro stansiyası
4. M6 “Əhmədli” metro stansiyası – S.Vurğun bağı
5. M7 “İnşaatçılar” metro stansiyası – “N.Nərimanov” metro stansiyası
M3, M4, M5, M6 və M7 ekspres xətləri üzrə avtobuslar səhər saat 09:00-dan 17:00-dək fəaliyyət göstərəcək. Daha əvvəl təşkil olunan M1 və M2 ekspres xətlərinin iş qrafiki isə (06:00-22:00) dəyişməz qalır.
Müntəzəm marşrut xətləri üzrə sərnişin avtobuslarının fəaliyyəti də adi rejimdə davam edəcək. Gündəlik xəttə çıxan avtobusların sayı sərnişin axınına uyğun olaraq tənzimlənəcək. Sərnişinlərə zəruriyyət olmadığı təqdirdə evdən çıxmamaları tövsiyə edilir.
