Adil Əliyev ARDNF-in Müşahidə Şurasına üzv oldu
Azərbaycan Respublikası Dövlət Neft Fondunun (ARDNF) Müşahidə Şurasında Milli Məclisi təmsil edəcək üzv kimi parlamentin sədr müavini Adil Əliyev təyin edilib.
Rakus.az xəbər verir ki, fonddan verilən məlumata görə, A.Əliyev 2005-2020-ci illər üzrə Milli Məclisin III, IV, V və VI çağırış deputatıdır. O, 10 mart 2020-ci il tarixində Milli Məclis sədrinin müavini, parlamentin Gənclər və İdman Komitəsinin sədri seçilib.
Milli Məclisin Parlamentlərarası İttifaqdakı nümayəndə heyətinin və Azərbaycan-Qazaxıstan parlamentlərarası dostluq qrupunun rəhbəri, 2009-cu ildən Müstəqil Dövlətlər Birliyinin Müdafiə və Təhlükəsizlik Komitəsinin sədr müavinidir. Daha əvvəl A.Əliyev Azərbaycanın daxili işlər orqanlarında müxtəlif vəzifələrdə çalışıb.
Qeyd edək ki, Prezident İlham Əliyevin 9 dekabr 2019-cu il tarixli sərəncamına əsasən, ARDNF-in Müşahidə Şurasının yeni tərkibi təsdiqlənib.
Sənədə görə, ARDNF-in Müşahidə Şurasının yeni tərkibinə Baş nazir, Milli Məclis sədrinin müavini, Prezidentin köməkçisi – Prezident Administrasiyasının İqtisadi məsələlər və innovativ inkişaf siyasəti şöbəsinin müdiri, Prezidentin köməkçisi – Prezident Administrasiyasının İqtisadi siyasət və sənaye məsələləri şöbəsinin müdiri, Maliyyə naziri, İqtisadiyyat naziri və Mərkəzi Bankın sədri daxildir.
