Avstriyadai futbol çempionatı başa çatdırılır
Avstriya hökuməti mayın 12-də futbol üzrə ölkə çempionatının – Bundesliqanın 2019-2020-ci il mövsümünün sonadək oynanılması ilə bağlı qərar qəbul edib.
Rakus.az xəbər verir ki, martın ortalarından dayandırılan çempionatda iştirak edən komandalar mayın 15-dən təlim-məşq prosesinə start verə biləcəklər. Ən geci üç həftə sonra isə müvafiq təhlükəsizlik şərtlərinə əməl etməklə oyunlar başlayacaq. Lakin bütün oyunlar azarkeşlərin iştirakı olmadan təşkil ediləcək.
Avstriya Bundesliqasının prezidenti Xristian Ebenbauer bildirib ki, çempionat cədvəlində hələ on dövrənin oyunları baş tutmalıdır və iyunun əvvəlində matçlara start verilə bilər.
Vitse-kansler və İdman naziri Verner Koqler və Səhiyyə naziri Rudolf Anşober birgə brifinqdə elan ediblər ki, milli çempionatla yanaşı, açıq hava şəraitində komanda oyunları da bərpa olunacaq.
Hökumət üzvləri bu qərarı gündəlik normal həyata doğru növbəti addım kimi dəyərləndiriblər.
Həmçinin qeyd edilib ki, ilk məşqdən öncə bütün futbolçu, məşqçi və texniki heyətlər koronavirusla bağlı testdən keçməlidirlər.
