ABŞ-ın gündəlik neft istehsalını artırır
ABŞ-ın neft hasilatı cari ildə gündəlik orta hesabla 12,45 milyon barrel təşkil edəcək.
Rakus.az xəbər verir ki, bu barədə ABŞ-ın Enerji İnformasiya Administrasiyasının (EIA) məlumatında deyilir.
Bildirilir ki, gələn il isə Birləşmiş Ştatların neft istehsalının sutkada 13,4 milyon barrel olacağı nəzərdə tutulur.
EIA-nın 2019-cu il üzrə gündəlik hasilatla bağlı əvvəlki proqnozu 12,4 milyon barrel, 2020-ci ilə dair isə 13,1 milyon barrel idi.
Ötən həftə ABŞ-ın xam neft ehtiyatları da artıb.
Bu barədə əsasən özəl sektorun maliyyələşdirdiyi Amerika Neft İnstitutu (API) məlumat yayıb. Bildirilir ki, keçən həftə ölkədəki neft ehtiyatları əvvəlki həftə ilə müqayisədə 2,81 milyon barrel artaraq 469,2 milyon barrel olub. Bazar proqnozları da ehtiyatların artacağı istiqamətində idi.
Əvvəlki həftə isə ABŞ-ın neft ehtiyatları 6,8 milyon barrel artmışdı.
Ölkədəki ehtiyatlarla bağlı rəsmi rəqəmlər ABŞ-ın Enerji İnformasiya Administrasiyası (EIA) tərəfindən açıqlanacaq.
