Adil Əliyev 50 yaşını qeyd edir - FOTO
Azərbaycan Kikboksinq Federasiyasının prezidenti, Milli Məclisin deputatı Adil Əliyev bu gün 50 yaşını qeyd edir.
Rakus.az xəbər verir ki, Adil Abış oğlu Əliyev 1969-cu il sentyabrın 25-də Naxçıvan Muxtar Respublikasının Şərur rayonunun Maxta kəndində anadan olub. 1987-ci ildə Bakı idman təmayüllü internat məktəbini bitirib. 1992-ci ildən İdman Ustasıdır. 1992-ci ildə Rusiya Federasiyasının Sankt-Peterburq şəhərindəki M.V.Frunze adına Ali Hərbi Dənizçilik Akademiyasını bitirib. 1992-1993-cü illərdə Azərbaycan Respublikasının Hərbi Dəniz Qüvvələrində zabit kimi xidmət edib.
Daxili İşlər orqanlarında (1994-2003-cü illərdə) müxtəlif vəzifələrdə — Bakı şəhəri Səbail rayon 39-cu polis bölməsində rəis müavini, Nəqliyyatda Baş Polis İdarəsinin Bərə keçid bölməsinin rəisi, Binəqədi rayon Polis İdarəsinin Narkotiklərlə Mübarizə bölməsinin rəisi, Yasamal rayon Polis İdarəsinin Cinayət Axtarış Şöbəsinin rəisi işləyib. 1998-ci ildə Daxili İşlər Nazirliyinin Polis Akademiyasını bitirib. 2000-ci ildə “Polis Əlaçısı” olub.
Azərbaycan Kikboksinq Federasiyasının 2000-ci ildən prezidentidir. Bakı Dövlət Universitetinin magistraturasını, sonra isə aspiranturasını bitirib, polis polkovnik-leytenantı rütbəsinə layiq görülüb.
Bakı şəhəri Nərimanov rayon Polis İdarəsinin 16-cı bölməsinin (2003-2005-ci illərdə) rəisi işləyib.
Azərbaycan Respublikası Prezidentinin Fərmanı ilə “İgidliyə görə” dövlət mükafatı ilə təltif edilib və 2009-cu ildə MDB Müdafiə və Təhlükəsizlik Komitəsinin Sədr müavini işləyib.
Kikboksinq üzrə (2009-cu ildə) veteranlararası Dünya Çempionu olub. 20 saylı Nərimanov II seçki dairəsindən 2005-ci ildə III çağırış, 2010-cu ildə IV çağırış və 2015-ci ildə V çağırış Azərbaycan Respublikasının Milli Məclisinin deputatı seçilib. 2005-2010-cu illərdə Milli Məclisin Təhlükəsizlik və Müdafiə məsələləri daimi komissiyasının üzvü, Azərbaycan-Hollandiya parlamentlər arası əlaqələr üzrə İşçi qrupunun rəhbəri, Azərbaycan-Rusiya, Azərbaycan-Ukrayna, Azərbaycan-Almaniya və Azərbaycan-Türkiyə parlamentlər arası əlaqələr üzrə İşçi qrupunun üzvü olub.
2012-ci ildə çap olunmuş “Erməni soyqırımı: mif və gerçəklik” adlı kitabın ingiliscədən Azərbaycan və rus dilinə tərcuməsinin ideya müəllifi olmuşdur. Kitabda uydurma erməni soyqırımı tarixi faktlarla ifşa olunur, qonşularımızın Azərbaycan və Türk xalqlarına qarşı apardığı terrorçu siyasətdən bəhs edilir.
2012-ci ildə “Kütləvi iğtişaş əməlləri ilə mübarizənin cinayət-hüquqi və kriminoloji problemləri” adlı monoqrafiyası işıq üzü görmüşdür. Monoqrafiya kütləvi iğtişaş əməlləri və kriminoloji problemlərin tədqiqinə həsr edilmişdir.
Hüquq üzrə Fəlsəfə doktoru elmi dərəcəsi (9 aprel 2013-cü ildə) almışdır.
Ailəlidir, üç övladı var.
Bu yubilyarın qısa tərcümeyi halıdır. Onun dövlətçilik, vətənpərvərlik, qanunvericilik fəaliyyəti, idmana, şəhid ailələrinə, müharibə əlillərinə və veteranlarına, milli-mənəvi dəyərlərə və digər sahələrlə olan diqqəti isə son dərəcə böyük əhəmiyyət kəsb edir. Belə ki, Adil müəllimin təşkilatçılığı ilə keçirilən idman yarışlarında gənclərimizə verdiyi məsləhətlər, onların milli ruhda sağlam böyüməsi üçün yaratdığı şərait, bütün tədbirlərdə şəhid ailələrinə və digər imtiyazlı şəxslərə göstərdiyi diqqət, Qarabağ hadisələri ilə bağlı çəkilən filmlərə dəstəyi bir millət vəkili olaraq dövlət siyasətinin layiqincə həyata keçirildiyinə əyani sübutdur.
Çoxşaxəli fəaliyyəti ilə seçicilərin etimadını doğruldan və rəğbətini qazanan Adil Əliyevi redaksiyamızın kollektivi adından səmimi qəlbdən təbrik edir, ona cansağlığı, uzun ömür və işlərində yeni-yeni uğurlar arzulayırıq.
