Bakıda ÜMŞA-nın illik toplantısı keçirilir - FOTO
Bakıda Ümumdünya Mətbuat Şuraları Assosiasiyasının illik toplantısı keçirilir.
Rakus.az xəbər verir ki, yığıncaqda 100-dək media nümayəndəsi, o cümlədən Azərbaycandan 60 nümayəndə iştirak edir.
İllik toplantıda çıxış edən Azərbaycan Mətbuat Şurasının sədri Əflatun Amaşov bildirib ki, Ümumdünya Mətbuat Şuraları Assosiasiyası 1992-ci ildə yaradılıb: “ABŞ-ın müəyyən ştatları, Türkiyə, Hindistan, Pakistan, Banqladeş, Nepal, Zimbabve, Kenya, Makedoniya və digər ölkələrin jurnalistləri belə bir qurum yaradıblar. O vaxtdan indiyə qədər qurum üzv ölkələrdə tədbirlər keçirir və jurnalistlərin qarşılaşdığı problem, informasiya əldə etmələri ilə bağlı yaranmış maneələrin aradan qaldırılması üçün təkliflər səsləndirilir. Yığıncaqlarda ümumilikdə dünyada medianın inkişaf meylləri müzakirə olunur”.
Əflatun Amaşov bildirib ki, Azərbaycan Mətbuat Şurası 2005-ci ildən bu qurumun üzvüdür.
Xatırladaq ki, iştirakçılar tədbirdə öz ölkələrində söz azadlığı və medianın durumu, o cümlədən mövcud problemlərə dair məruzələrlə çıxış edəcəklər.
Ümumdünya Mətbuat Şuraları Assosiasiyasının illik toplantısı sentyabrın 15-dək davam edəcək.
