Şəhid jurnalistin məzarı 5-ci ildönümündə ziyarət olunub
Mərasimində şəhidin ailə üzvləri, AZƏRTAC-ın rəhbər və işçi heyəti, Binəqədi Rayon İcra Hakimiyyətinin və M.Ə.Rəsulzadə bələdiyyəsinin rəhbər şəxsləri iştirak ediblər.
Şəhid jurnalistin qardaşı Əsgər İbrahimov, bacısı Sevda Əsgərova, AZƏRTAC-ın İdarə Heyətinin sədr müavini Dağbəyi İsmayılov, Binəqədi Rayon İcra Hakimiyyəti başçısı Aparatının məsul əməkdaşı Rəhman Qəhrəmanov və M.Ə.Rəsulzadə qəsəbəsi bələdiyyəsinin sədri Hümbət Hüseynov çıxış edərək, Məhərrəm İbrahimovun şərəfli ömür yolundan, onun hərbi jurnalistika tariximizə yazdığı qəhrəmanlıq salnaməsindən söz açıblar.
Sonra şəhidin evində ehsan süfrəsi açılıb.
Xatırladaq ki, Məhərrəm Əli oğlu İbrahimov 1982-ci il aprelin 16-da Göyçə mahalının Çəmbərək rayonu Ardanış kəndində anadan olub.
2004-cü il sentyabrın 1-dən Azərbaycan Dövlət İnformasiya Agentliyində müxbir, 2007-ci il yanvarın 16-dan aparıcı müxbir vəzifəsində çalışıb. AZƏRTAC-da çalışdığı 20 ilə yaxın ordunun və hüquq-mühafizə orqanlarının fəaliyyəti, eləcə də ən qaynar nöqtələr, ən isti, operativ xəbərlər onun təqdimatında işıqlandırılıb və hərbi jurnalist kimi ixtisaslaşıb. 2021-ci il iyunun 4-də işğaldan azad olunan Kəlbəcər rayonunun, Susuzluq kəndi yaxınlığında çəkiliş qrupunu daşıyan avtomobilin minaya düşməsi zamanı həlak olub. Ölümündən sonra Azərbaycan Prezidenti İlham Əliyevin 14 iyunun 2021-ci il tarixində imzaladığı Sərəncamla işğaldan azad olunan ərazilərdə vəzifə borcunu yerinə yetirmiş İbrahimov Məhərrəm Əli oğlu “3-cü dərəcəli “Vətənə xidmətə görə” ordeni ilə təltif edilib. Binəqədi rayonu, Rəsulzadə qəsəbəsində yaşadığı evdə xatirə lövhəsi və baralyefi istifadəyə verilib. Həmin qəsəbənin keçmiş Sahilboyu küçəsi Şəhid jurnalist Məhərrəm İbrahimovun adını daşıyır. Azərbaycan mətbuatının 150 illik yubileyi münasibətilə 2025-ci il iyulun 22-də Məhərrəm İbrahimovun ömür yolundan bəhs edən “Jurnalist ömrünün əbədiyyət nəğməsi” kitabı işıq üzü görüb və təqdimatı keçirilib.
