Həqiqət izində həqiqətin axtardığı ADAM
Məhərrəm, sən qələminlə həqiqətin izinə düşən, sözün gücünə inanan insanlardan idin. Yolun çətin, missiyan məsuliyyətli olsa da, peşə borcunu hər şeydən üstün tutdun. Həqiqətləri insanlara çatdırmaq üçün ən təhlükəli məkanlara getdin, ən ağır şəraitdə çalışdın. O son səfərin də elə Vətənə, xalqa xidmət yolunun davamı idi. Susuzluq kəndi yaxınlığında yarımçıq qalan ömrün, əslində, xalqın yaddaşında tamamlanan bir qəhrəmanlıq dastanına çevrildi. Sənin səsin kəsilsə də, yazdığın xəbərlər, göstərdiyin fədakarlıq və peşəkarlıq gələcək nəsillərə örnək olaraq yaşayır.
Bu gün səni tanıyanlar da, tanımayanlar da adını ehtiramla çəkir. Çünki sən sadəcə jurnalist deyildin; sən həqiqətin keşiyində duran bir vətəndaş, Vətəninə xidmət edən bir insan idin. Beş il əvvəl – 4 iyun 2021-ci ildə Azərbaycanın Kəlbəcər rayonunun Susuzluq kəndi istiqamətində baş verən mina partlayışı ölkə ictimaiyyətində böyük kədər doğurdu. “Susuzluq faciəsi” kimi tarixə düşən bu hadisədə səni itirdik. Bu, İkinci Qarabağ müharibəsi dövründə döyüşlərin getdiyi ərazidə jurnalist ölümü ilə bağlı ilk hal oldu. Bu faciə həm də İkinci Qarabağ müharibəsindən sonra mina təhlükəsinin jurnalistlər üçün yaratdığı riskləri, işğaldan azad olunmuş ərazilərdə mina təhlükəsinin nə qədər ciddi olduğunu bir daha nümayiş etdirdi. “Susuzluq faciəsi” Azərbaycan jurnalistika tarixində peşə borcunu yerinə yetirərkən şəhid olmuş media nümayəndələrinin qəhrəmanlığının simvollarından biri kimi yadda qaldı.
Həmin faciədən artıq 5 il keçir. Təbii olaraq, xatirən Azərbaycan media ictimaiyyəti tərəfindən hər il ehtiramla yad edilir, anılır. Çünki sən digər şəhid jurnalist həmkarların kimi, peşə borclarını yerinə yetirərkən həyatını itirdin, Azərbaycanın media tarixində qəhrəmanlıq və fədakarlıq nümunəsinə çevrildin. Ölümünə səbəb olan hadisə beynəlxalq səviyyədə də diqqət çəkdi, müharibədən sonrakı dövrdə minaların mülki şəxslər və media nümayəndələri üçün yaratdığı təhlükə ilə bağlı narahatlıqları artırdı, Azərbaycanın xarici siyasətində istiqamətverici rol oynadı. Ona görə də başını uca tut, Məhərrəm. Sənin şərəfli ömrün və müqəddəs xatirən heç vaxt unudulmayacaq. Adın da, əməllərin də xalqın yaddaşında daim yaşayacaq.
Ruhun şad, məkanın cənnət olsun!
Allah bütün şəhidlərimizə rəhmət etsin!
Xatırladaq ki, beş il əvvəl işğaldan azad edilmiş ərazilərdə çəkiliş aparmaq və bölgədəki vəziyyəti işıqlandırmaq üçün səfərdə olan media nümayəndələrini daşıyan avtomobil tank əleyhinə minaya düşdü. Nəticədə çəkiliş qrupunun iki üzvü – AZƏRTAC-ın müxbiri Məhərrəm İbrahimov və Azərbaycan Televiziyasının (AzTV) operatoru Sirac Abışov, habelə Kəlbəcər Rayon İcra Hakimiyyətinin nümayəndəsi Arif Əliyev şəhid oldular, daha dörd nəfər isə müxtəlif dərəcəli bədən xəsarətləri aldı.
