Ağsu dolaylarındakı obyektlər sökülür – obyekt sahibləri narazılıq edirlər - FOTO
Ağsu Rayon İcra Hakimiyyəti tərəfindən Ağsu dolaylarında olan obyektlər sökülür. Bu isə obyekt sahiblərinin narazılığına səbəb olub.
Rakus.az xəbər verir ki, bu barədə redaksiyamıza daxil olan şikayət məktubunda məlumat verilir.
Məlumat üçün bildirim ki, Ağsu Rayon İcra Hakimiyyəti tərəfindən Ağsu dolaylarında olan obyektlərin sökülməsi aparılır.
Mən bir obyekt sahibi kimi, bu haqqsızlıqdan şikayətçiyəm. Mənim obyektim Ağsru Rayon İcra Hakimiyəti başçısının 1998-ci ildə verdiyi sərəncam əsasında təsdiq edilmiş texniki sənədlə tikilib. Texniki pasportum və digər sənədlərim qaydasındadır və tikintiyə 28 min dollar xərc qoymuşam. Yalnız bunlar obyekt sökülməlidir və bizim deyəcəyimiz yeni tikinti layihəsi ilə tikilməlidir. Yeni layihə əsasında tikilməsi üçün bir ay vaxt verirlər. Bir ay ərzində kim həmin layihə əsasında obyektini yenidən tikə bilməsə, həmin obyekt əlindən alınacaq. Heç kimin o qədər maddi imkanı yoxdur ki, yenidən tikinti aparsın.
Ölkənin bu çətin günündə dövlət başçısının sahibkarlara və aztəminatlı ailələrə dövlət dəstəyinin vacibliyini ifadə etdiyi halda, məmurların əhalini narazı salmaları, insanların alın təri ilə tikdikləri obyektləri sökməklə, onlarla insanı çörəksiz qoymağı nə dərəcədə qanuni və məntiqə uyğundur.
Xahiş edirəm, bunu işıqlandırasınız!”
Xatırladaq ki, bu mövzu ilə bağlı bütün tərəflərin mövqeyini işıqlandırmağı KİV olaraq özümüzə borc hesab edirik.
