NASA ayda qəza yerini tapdı
Amerikanın NASA Kosmik Agentliyi “Bereşit” kosmik aparatının Ayda qəzaya uğradığı yerin şəkillərini dərc edib.
Bu şəkilləri bu il aprelin 22-də LRO Ay orbit aparatının kameraları çəkib.
Məlumatda bildirilir ki, kameralar təqribən 10 metr enində tünd ləkə qeydə alıb: “Bu da zərbənin yerini göstərir. Tünd çalar sərt eniş zamanı səthin kələ-kötür olduğundan xəbər verir”.
Qara ləkə ağ dairələrlə əhatə olunub. Alimlərin fikrincə, Ayın səthinə dəyən zərbə səbəbindən toz qalxıb və səth daha yüksək əksetmə qabiliyyəti qazanıb.
Lakin şəkillərdən aparatın dərin krater buraxıb-buraxmadığını müəyyən etmək çətindir.
Xatırladaq ki, bu il aprelin 11-də qəzaya uğramış gəmi 585 kq çəkiyə malik olub. Onun 400 kq yanacağın çəkisidir. Gəmi aşağı sürətlə hərəkət edib.
