Abbas Bağırovun seçki kampaniyası: “Seçin ki, seçiləsiniz!” - FOTO
Azərbaycanın 39 saylı Kəpəz birinci (Gəncə) seçki dairəsindən deputatlığa namizəd Abbas Əli oğlu Bağırovun seçk kampaniyası çərçivəsində “Seçin ki, seçiləsiniz” devizi altında yanvarın 25-də Gəncədə mini futbol turniri təşkil olunub.
Rakus.az xəbər verir ki, turnir Milli Məclisə növbədənkənar seçkilərinə diqqəti cəlb etmək, Kəpəz birinci (Gəncə) seçki dairəsi üzrə seçicilərin fəallığını artırmaq, gənclərin və gənc seçicilərin idmana marağının gücləndirilməsi məqsədi daşıyıb.
Turnirin açılışında iştirak edən deputatlığa namizəd Abbas Bağırov belə aksiyaların əhəmiyyətindən söz açıb. O bildirib ki, seçici fəallığının, gənclərin idmana marağının artırılması baxımından faydalı olan belə turnirlərin gələcəkdə də keçirilməsi məqsədəuyğundur.
A.Bağırov qeydə alındığı dairədə seçicilərin əksəriyyətinin gənclər olduğunu diqqətə çatdıraraq deyib ki, məqsədimiz gənclərin daha sağlam, vətənpərvər ruhda böyüməsinə yardımçı olmaqdır və seçki platformamızda bu məsələ prioritet təşkil edir.
Turniri izləmək üçün gələn Gəncə sakinləri futbol qarşılaşmasının maraqlı təşəbbüs olduğunu, belə tədbirlərin daim maraq doğurduğunu söyləyiblər. Onlar böyük məmnuniyyətlə fevralın 9-da seçki məntəqələrinə gələrək seçkilərdə fəal iştirak edəcəklərini, öz namizədlərinə səs verəcəklərini bildiriblər.
Sonra mini futbol qarşılaşmasına start verilib. Meydançaya “Seçicilər 1” və “Seçicilər 2” adlı rəmzi komandalar çıxıb. Maraqlı idman mübarizəsi şəraitində və qarşılıqlı hücumlarla keçən görüş 10:11 hesabı ilə “Seçicilər 2” komandasının qələbəsi ilə yekunlaşıb.
