Türkiyə millisinin Bakıda iki oyun keçirəcəyi bizi sevindirir – Elxan Məmmədov
Bu gün Buxarest şəhərində təşkil olunmuş püşkatma mərasimində AFFA-nın rəhbərliyi ilə birgə iştirak etdik. Sevindirici haldır ki, Bakı Avropa çempionatına ev sahibliyi edəcək şəhərlərdən biridir. Qrup mərhələsinin 3 oyunu ilə yanaşı, Bakı 1/4 final mərhələsinin oyunlarının keçiriləcəyi 4 şəhərin də sırasındadır. Böyük bir futbol bayramının birbaşa iştirakçısı olacağıq. Xüsusilə, Türkiyə millisinin qrup mərhələsində Bakıda iki oyun keçirəcəyi bizi sevindirir.
Rakus.az xəbər verir ki, bunu AFFA-nın baş katibi Elxan Məmmədov AVRO0-2020-nin püşkünün nəticələri barədə danışarkən deyib
O bildirib ki, Türkiyə futbolunun Azərbaycanda azarkeşləri çoxdur. Üstəlik, Türkiyədən öz milli komandalarının oyununa getmək istəyənlər üçün ən rahat, ən yaxın və ən dogma şəhər Bakıdır.
“Bu baxımdan həm bizim üçün çox şanslı püşkatma oldu ki, Türkiyə millisi Bakıda oynayacaq. Eyni zamanda, Türkiyə komandası üçün də uğurlu alındı ki, rəqibləri ilə Azərbaycan paytaxtında qarşılaşacaq.”, AFFA-nın baş katibi vurğulayıb.
E.Məmmədov Uels və isveçrə milliləri barədə də danışıb: “Uels millisinin azarkeşlərinə də sözümüz var: Bakıda pivə keyfiyyətlidir və Uelsdəkindən ucuzdur. Bu bir zarafat olsa da, hər zarafatın mahiyyətində bir ciddi məqam da var. Təbii ki, İsveçrə azarkeşlərini də Bakıda gözləyirik və ölkəmizə təşrif buyuracaq bütün futbolsevərlər böyük futbol festivalının şahidi olacaqlar”.
Xatırladaq ki, Avropa 2020-nin 4 oyunu Bakı Olimpiya Stadionunda təşkil olunacaq. İyunun 13-də, 17-də və 21-də A qrupunun üç qarşılaşması, iyulun 4-də isə dörddəbir final mərhələsinin bir görüşü paytaxtımızda keçiriləcək.
