İnsanları halallığa və yüksək əxlaqa çağıran adam – Kərəm Həsənzadənin vəfatının 60 illiyinə
Göyçə mahalının tanınmış maarifçisi, müəllimi, din alimi və el ağsaqqalı Kərəm Kərbəlayı İsaq oğlu Həsənzadə ömrünü elmə, mənəviyyata və xalqına xidmətə həsr etmiş görkəmli ziyalılardan idi.
1899-cu ildə Göyçə Mahalının Çəmbərək rayonunun Ardanış kəndində anadan olan Kərəm Həsənzadə Gəncədə Şah Abbas məscidinin nəzdindəki mədrəsədə mükəmməl təhsil almış, ilahiyyatla yanaşı fəlsəfə, tarix, coğrafiya, astronomiya, təbabət və müsəlman hüququnu öyrənmişdir. O, ərəb, fars, türk, rus, gürcü və erməni dillərini bilirdi.
Uzun illər Göyçə mahalının müxtəlif kəndlərində, o cümlədən Ardanış və Cil kəndlərində müəllimlik etmiş, gənclərin savadlanmasına və mənəvi tərbiyəsinə töhfə vermişdir.
Sovet hakimiyyətinin dinə və milli-mənəvi dəyərlərə qarşı sərt qadağalarına baxmayaraq, Kərəm Həsənzadə öz əqidəsinə sadiq qalmış, Göyçə və Gədəbəy bölgəsində yüzlərlə insana Qurani-Kərimi öyrətmiş, insanları haqqa, ədalətə, halallığa və yüksək əxlaqa çağırmışdır. O, xalq arasında müdrik insan, savadlı din alimi və nüfuzlu el ağsaqqalı kimi böyük hörmət qazanmışdır.
Kərəm Həsənzadə həm də nümunəvi ailə başçısı olmuş, 12 övlad (6 oğul, 6 qız) böyütmüşdür. Bu gün onun 53 nəvəsi, çoxsaylı nəticə və kötücələri müxtəlif sahələrdə bilikləri, peşəkarlıqları və yüksək mənəvi keyfiyyətləri ilə cəmiyyətə və dövlətə ləyaqətlə xidmət edir, onun qoyduğu mənəvi irsi yaşadırlar.
Kərəm Kərbəlayı İsaq oğlu Həsənzadənin ömür yolu elmə, mənəviyyata, Vətənə və xalqa sədaqətlə xidmətin parlaq nümunəsidir. O, 1966-cı il iyulun 24-də haqqın dünyasına qovuşub. Onun vəfatının 60-cı ildönümündə bu böyük maarifçi və ziyalının əziz xatirəsini dərin ehtiramla yad edir, Uca Allahdan ona rəhmət diləyirik.
Ruhu şad, məqamı cənnət olsun!
