“Qafqaza Qərb qüvvələrini İrəvanın yerləşdirməsi İrana qarşıdır”
Qərbi Azərbaycan Xronikası layihəsi çərçivəsində növbəti analitik süjet hazırlanıb.
Rakus.az xəbər verir ki, “Ermənistan ABŞ-İran müharibəsinin regional platformasına çevrilə bilər” adlı süjetdə gələcəkdə ABŞ-nin İrana hərbi müdaxiləsi, Ermənistanı gözləyən fəlakətlərdən bəhs olunur.
Bildirilir ki, Tramp Administrasiyası İrana yeni nüvə anlaşması üçün may ayına qədər vaxt verib: “Hazırda ABŞ-İran arasında kəskinləşmə artan xətt üzrə davam edir. Diplomatik müstəvidə sərt ritorikanın müşahidə edilməsi fonunda ABŞ-nin Yaxın Şərqə hərbi kontingent yığıması da müharibə ssenarilərini aktuallaşdırır. Hədəf mümkün hərbi müdaxilədə İranın nüvə obyektlərinə zərbələrin endirilməsidir. İranla müharibənin bütün regiona mənfi təsir edəcəyi bəllidir. Hərçənd, bu məsələnin ən çox Ermənistanda müzakirə edilməsi xüsusilə diqqət çəkir və bu, heç də təsadüfi deyil”.
Qeyd olunur ki, İrana qarşı mümkün hərbi müdaxilə hər şeydən öncə Ermənistanı regional müttəfiqdən məhrum edə və İrəvanın Tehranla iqtisadi əlaqələrinə ciddi təsir göstərə bilər ki, bu, Ermənistan üçün fəlakət ssenarilərindən biri kimi qiymətləndirilir. Politoloq Artur Xaçikyanın fikrincə, ABŞ-nin İrana hücumu Ermənistan üçün ciddi təhlükə yaradacaq: “Hərbi toqquşma fonunda “Sünik məsələsi” (Zəngəzur dəhlizi) Azərbaycan və Türkiyənin maraqları çərçivəsində həllini tapa bilər. Ermənistan regionda təklənə və Bakı ilə Ankaranın Zəngəzur tələbi qarşısında geri çəkilə bilər”.
İranlı ekspert Xəyal Moazzin isə Ermənistan mediasına bildirib ki, əgər münaqişə regional miqyas alarsa, Ermənistan İran, Türkiyə və Azərbaycanın təsir dairələri arasında qalacaq.
Diqqətə çatdırılır ki, mümkün variantda Ermənistan İrana qarşı platformaya çevrilə bilər: “Zəngəzur bölgəsində fəaliyyət göstərən Avropa İttifaqının müşahidə missiyasının İrana qarşı kəşfiyyat fəaliyyətinə dair yayılan məlumatlar bu kontekstdə diqqət çəkir. Bu baxımdan, ABŞ istəyəcəyi təqdirdə Ermənistan İrana qarşı platforma olmağa razı olacaq. Hərbi ekspert David Camalyan hesab edir ki, Paşinyan Vaşinqtonla İrana qarşı sövdələşə və ABŞ hərbi bazalarını Ermənistana gətirə bilər”.
Sonda vurğulanır ki, ABŞ hərbi kontingenti Ermənistana gətirilərsə, İranla sərhəddə – Zəngəzur bölgəsində yerləşdiriləcək və mümkün müharibə hücum bu bölgədən ediləcək. Bu isə fəlakətli ssenarilər vəd edir və Ermənistanın dövlət kimi mövcudluğu sual altına düşə bilər”.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Süjet sənətşünaslıq üzrə fəlsəfə doktoru Elçin Əlibəylinin təqdimatında aprelin 10-da saat 19:30-da Baku Tv-nin efirində və saat 21:30-da YouTube kanalında yayımlanıb.
