ABŞ-ın siyasi gündəmi – Bolton-Pompeo-Tramp qarşıdurması – TƏHLİL - FOTO
ABŞ və Şimali Koreya arasında 2018-ci ildə keçirilən tarixi sammitdə ABŞ-ın dövlət katibi Maykl Pompeo Prezident Donald Trampı gəvəzə adlandırıb.
Rakus.az xəbər verir ki, bunu ABŞ prezidentinin milli təhlükəsizlik məsələləri üzrə keçmiş müşaviri Con Bolton memuarlarında yazıb.
Sabiq müşavirin “Hadisənin baş verdiyi otaq: Ağ evin xatirələri” hələ işıq üzü görməsə də, qəzet kitabdan müəyyən hissələri dərc edir.
“2018-ci il iyunun 12-də Donald Tramp və Kim Çen Inın görüşündə Maykl Pompeo Con Boltona üzərində “O elə gəvəzədir ki” yazılmış kağız verib”, – “The New York Times” yazıb.
C.Boltonun sözlərinə görə, olaydan bir ay sonra M.Pompeo Ağ evin Şimali Koreya siyasətinin “uğursuzluğa məhkum” olduğunu vurğulayıb.
C.Bolton həmçinin qeyd edib ki, D.Trampın müşavirləri onun arxasınca gülürlər.
ABŞ-ın Ədliyyə Nazirliyi prezidentin sabiq milli təhlükəsizlik müşaviri Con Boltonu məhkəməyə verib. ABŞ hökuməti hesab edir ki, Bolton müşavir vəzifəsinə təyin edildiyi zaman gizli məlumatları açıqlamamaqla bağlı üzərinə götürdüyü öhdəlikləri pozur.
Prezident Donald Tramp bildirib ki, ABŞ prezidentinin sabiq milli təhlükəsizlik müşaviri Con Bolton yazdığı kitabda məxfi məlumatları faş edərək qanunu pozub.
Onun sözlərinə görə, C.Boltonun “Bunun baş verdiyi otaq: Ağ Ev xatirəsi” adlı kitabında açıqlanmağa icazə verilməyən bəzi məxfi məlumatlar da var.
Xatırladaq ki, 2019-cu ilin sentyabr ayında Prezident Tramp Con Boltonu istefaya göndərərək bunu milli təhlükəsizliklə bağlı aralarında kəskin fikir ayrılıqları olması ilə əsaslandırmışdı. Bundan bir ay sonra C.Boltonun milli təhlükəsizlik müşaviri işlədiyi dövr haqqında kitab yazmaq istəməsi 2019-cu ilin oktyabr ayında bəlli olub.
